સુરતમાં રાજ્યસભાના સાંસદ અને ‘શ્રીરામકૃષ્ણ એક્સપોર્ટ’ (SRK) ના સ્થાપક ગોવિંદ ધોળકિયાના પુત્ર શ્રેયાંશ ધોળકિયા સાથે કરોડો રૂપિયાની વિશ્વાસઘાત અને છેતરપિંડી આચરનાર પતિ-પત્ની સામે સુરત ક્રાઇમ બ્રાન્ચે મોટી કાર્યવાહી કરી છે. ઈ-સ્ટેમ્પ વેન્ડર તરીકેનું સત્તાવાર લાયસન્સ ધરાવતા આરોપી દંપતીએ જમીન ખરીદીના દસ્તાવેજો માટે ઈ-સ્ટેમ્પ કાઢી આપવાનો દાવો કરી રૂ. 76,44,900 ની માતબર રકમ પડાવી લીધી હતી.

સુરત ક્રાઇમ બ્રાન્ચે ઠગબાજ દંપતીની કરી ધરપકડ

તપાસ અધિકારીઓના જણાવ્યા મુજબ, આરોપી ઈ-સ્ટેમ્પ વેન્ડર રામકૃષ્ણ મેવાવાળા અને તેની પત્ની સલોની મેવાવાળાએ ફરિયાદીને વિશ્વાસમાં લીધા હતા કે તેઓ સત્તાવાર રીતે ઈ-સ્ટેમ્પ પૂરા પાડશે. ફરિયાદી પક્ષ તરફથી રૂ. 76.44 લાખ મેળવ્યા બાદ આરોપીઓએ આ ઈ-સ્ટેમ્પ પોતાના નામે મેળવી લીધા હતા અને ત્યારબાદ ધોળકિયા પરિવારને આપવાને બદલે કોઈ અન્ય ત્રીજી જ વ્યક્તિને ઈશ્યુ કરી દીધા હતા.

જમીન દસ્તાવેજ માટે ઈ-સ્ટેમ્પ ખરીદવાના નામે ઠગાઈ

ઈ-સ્ટેમ્પ અન્યને ઈશ્યુ કરી દીધા બાદ જ્યારે ફરિયાદીએ પોતાના નાણાં કે ઈ-સ્ટેમ્પ પરત માંગ્યા ત્યારે આરોપી દંપતીએ ગોળગોળ જવાબો આપી નાણાં આપવાનો સ્પષ્ટ ઇનકાર કરી દીધો હતો. આ અંગે શ્રેયાંશ ધોળકિયા વતી તેમની ડાયમંડ કંપનીના મેનેજર કનુભાઈએ 10 જૂન 2025ના રોજ સુરત પોલીસ મથકે ઠગબાજ દંપતી સામે વિશ્વાસઘાત અને છેતરપિંડીની સત્તાવાર ફરિયાદ નોંધાવી હતી.

ઈ-સ્ટેમ્પના નામે રૂ. 76.44 લાખની ઠગાઈ

આ હાઇ-પ્રોફાઇલ આર્થિક ગુનાની ગંભીરતાને ધ્યાનમાં રાખીને તપાસ સુરત ક્રાઇમ બ્રાન્ચને સોંપવામાં આવી હતી. ક્રાઇમ બ્રાન્ચે બાતમી અને ટેકનિકલ સર્વેલન્સના આધારે દરોડો પાડીને મહિલા આરોપી સલોની મેવાવાળા અને તેના પતિ રામકૃષ્ણ મેવાવાળાની વિધિવત્ ધરપકડ કરી લીધી છે. આ કૌભાંડમાં અન્ય કોઈ લોકોની સંડોવણી છે કે કેમ અને હડપ કરેલી રકમ ક્યાં રોકાણ કરવામાં આવી છે તે અંગેની ઊંડાણપૂર્વકની પૂછપરછ માટે ક્રાઇમ બ્રાન્ચ બંને આરોપીઓને અદાલતમાં રજૂ કરી રિમાન્ડ મેળવવાની તજવીજ હાથ ધરી રહી છે.

આ પણ વાંચો:  Banaskantha: પાલનપુરના દલવાડામાં સામાજિક તકરારમાં નાના ભાઈએ મોટા ભાઈની કરી હત્યા