સુરત શહેરના ડીંડોલી વિસ્તારમાં અંગત અદાવતની દાઝ રાખીને એક યુવકને બેરહેમીપૂર્વક માર મારી મોતને ઘાટ ઉતારવાના ચકચારી પ્રકરણમાં ડીંડોલી પોલીસે મોટી સફળતા મેળવી છે. આ ઘાતકી હુમલામાં સામેલ 6 આરોપીઓને પોલીસે ઝડપી પાડી કાયદાનું ભાન કરાવ્યું છે. આરોપીઓએ મૃતક અનિલભાઈ અને તેમના સાથીદાર નીલેશ પર લાકડાના ફટકા અને ઈલેક્ટ્રીક વાયર વડે અમાનુષી અત્યાચાર ગુજાર્યો હતો, જેમાં ગંભીર ઈજાઓને કારણે અનિલભાઈનું કરૂણ મોત નીપજ્યું હતું, જ્યારે નીલેશ ગંભીર રીતે ઘાયલ થયો હતો.
ડીંડોલીમાં અંગત અદાવતમાં યુવકની હત્યા
આરોપીઓએ મૃતક અનિલભાઈ અને તેમના સાથીદાર નીલેશ સાથે જૂની કે અંગત અદાવત રાખીને પૂર્વઆયોજિત રીતે તેમના પર હુમલો કર્યો હતો. હુમલાખોરોએ અનિલભાઈ અને નીલેશને લાકડાના ફટકા તેમજ ઈલેક્ટ્રીક વાયર વડે બેફામ માર માર્યો હતો. આ જીવલેણ મારના કારણે અનિલભાઈ ગંભીર રીતે લોહીલુહાણ થઈ ગયા હતા અને તેમનું મોત નીપજ્યું હતું.આ હુમલામાં અનિલભાઈની સાથે રહેલા તેમના મિત્ર નીલેશને પણ શરીરે ગંભીર ઈજાઓ પહોંચી હતી, જેને સારવાર અર્થે હોસ્પિટલ ખસેડવામાં આવ્યો હતો.
આગળની કાયદેસરની કાર્યવાહી તેજ
ઘટનાની ગંભીરતાને ધ્યાનમાં રાખીને ડીંડોલી પોલીસે ઈજાગ્રસ્ત નીલેશની ફરિયાદના આધારે હત્યા અને જીવલેણ હુમલાનો ગુનો દાખલ કરી તપાસનો ધમધમાટ શરૂ કર્યો હતો. પોલીસે અલગ-અલગ ટીમો બનાવીને ગણતરીના સમયમાં જ આ ગુનામાં સંડોવાયેલા 6 આરોપીઓને દબોચી લીધા છે.ડીંડોલી પોલીસે ઝડપાયેલા તમામ 6 આરોપીઓની સઘન પૂછપરછ હાથ ધરી છે અને હુમલામાં વપરાયેલા લાકડાના ફટકા તથા ઈલેક્ટ્રીક વાયર સહિતના મુદ્દામાલ કબજે કરવાની તજવીજ હાથ ધરી છે.