સુરત મહાનગરપાલિકાના વોચ એન્ડ વોર્ડ વિભાગમાં વર્ગ-3ના સિક્યુરિટી ઓફિસર તરીકે ફરજ બજાવતા શૈલેષ મણીલાલ પારેખ લાંચ લેવાના ગંભીર મામલામાં ટ્રેપ થયા છે. એક જાગૃત કર્મચારી પોતાની પત્નીની બગડેલી તબિયત અને સારવાર અર્થે ફરજ દરમિયાન રજા મેળવવા માટે અરજી કરી હતી. જોકે, આરોપી શૈલેષ પારેખે નિયમ મુજબ મળવાપાત્ર રજા મંજૂર કરવાના બદલામાં રૂ.25,000ની ગેરકાયદેસર લાંચની માંગણી કરી હતી. પત્નીની સારવાર જેવા સંવેદનશીલ સમયે પણ અધિકારી દ્વારા આવી ધાકધમકી અને લાંચની માંગણી કરાતા અરજદાર ભારે મુશ્કેલીમાં મુકાયા હતા.
ACB નું સફળ છટકું અને કાર્યવાહી
લાંચની રકમ આપવાની જરાય ઇચ્છા ન હોવાથી જાગૃત કર્મચારીએ એન્ટી કરપ્શન બ્યુરોનો સંપર્ક સાધ્યો હતો અને સમગ્ર બાબતની વિગતવાર ફરિયાદ નોંધાવી હતી. ફરિયાદના આધારે ACB ની ટીમે તુરંત હરકતમાં આવીને લાંચિયા અધિકારીને પકડવા માટે એક મજબૂત છટકાંનું આયોજન કર્યું હતું. યોજના મુજબ, ફરિયાદી લાંચની રકમ આપવા માટે સુરત મહાનગરપાલિકા સ્થિત સિક્યુરિટી ઓફિસરની ચેમ્બરમાં પહોંચ્યા હતા. જેમ જ શૈલેષ પારેખે પોતાની ચેમ્બરમાં રૂ.25,000ની લાંચની રકમ સ્વીકારી, કે તુરંત જ ACBની ટીમે દરોડો પાડીને તેમને રંગેહાથ ઝડપી લીધા હતા.
કાયદાકીય શિકંજો અને રકમ રિકવર
ACB ની આ સફળ કામગીરી દરમિયાન આરોપીના કબ્જામાંથી લાંચના પૂરેપૂરા રૂ.25,000 રોકડા રિકવર કરવામાં આવ્યા છે. સ્થળ પર જ જરૂરી કાયદાકીય પંચનામાની કાર્યવાહી પૂર્ણ કરીને આરોપી શૈલેષ મણીલાલ પારેખ સામે ભ્રષ્ટાચાર નિવારણ અધિનિયમ (પ્રીવેન્શન ઓફ કરપ્શન એક્ટ) હેઠળ ગુનો નોંધી તેમની ધરપકડ કરવામાં આવી છે. મહાનગરપાલિકા જેવી સરકારી સંસ્થામાં બનેલી આ ઘટનાથી સમગ્ર પાલિકા આલમમાં અને ભ્રષ્ટ કર્મચારીઓમાં ભારે ફાફડાટ વ્યાપી ગયો છે. ACB ની આ ત્વરિત કાર્યવાહીની લોકમુખે ભારે પ્રશંસા થઈ રહી છે.