સુરતમાં સુરત મહાનગરપાલિકાના નામે બોગસ નિમણૂક પત્ર બનાવી છેતરપિંડી કરવાનો પ્રયાસ સામે આવ્યો છે. શનિવારે બપોરે તાપી ભવન ખાતે એક રાજસ્થાની મહિલા નિમણૂક પત્ર લઈને પહોંચી હતી. પત્રમાં કલેક્ટરનો સ્ટેમ્પ અને સરકારી ભાષામાં લખાણ હોવાથી સમગ્ર મામલો પ્રથમ નજરે અધિકૃત જણાતો હતો. જોકે, રિક્રૂટમેન્ટ ઓફિસરને પત્ર અંગે શંકા જતા તેની ખરાઈ કરવામાં આવી હતી અને સમગ્ર ખેલનો પર્દાફાશ થયો હતો.

નિમણૂક પત્રમાં કલેક્ટરનો સ્ટેમ્પ

મહિલાના હાથમાં રહેલા નિમણૂક પત્રમાં કલેક્ટરનો સ્ટેમ્પ લગાવવામાં આવ્યો હતો. સાથે જ સરકારી કચેરીના દસ્તાવેજ જેવું દેખાય તે રીતે ભાષાનો ઉપયોગ કરવામાં આવ્યો હતો. જેના કારણે પત્રને અધિકૃત બતાવીને વિશ્વાસ જગાવવાનો પ્રયાસ કરવામાં આવ્યો હોવાનું સામે આવ્યું છે.

ખરાઈ કરતા બોગસ પત્રનો પર્દાફાશ

મહિલા તાપી ભવન ખાતે પત્ર લઈને પહોંચ્યા બાદ રિક્રૂટમેન્ટ ઓફિસરને દસ્તાવેજ અંગે શંકા ગઈ હતી. ત્યારબાદ પત્રની ખરાઈ કરવામાં આવતા તે સુરત મહાનગરપાલિકાનો અસલી નિમણૂક પત્ર ન હોવાનું સામે આવ્યું હતું.

મહારાષ્ટ્રથી રાજસ્થાન પહોંચ્યો હતો પત્ર

તપાસ દરમિયાન આ બોગસ પત્ર મહારાષ્ટ્રથી આવ્યો હોવાનું અને રાજસ્થાનના સરનામે પોસ્ટ મારફતે પહોંચાડવામાં આવ્યો હોવાનું સામે આવ્યું છે. જોકે, સમગ્ર ઘટનામાં મહિલાએ પોતે નોકરી માટે કોઈ અરજી કરી ન હોવાનું પણ જાણવા મળ્યું છે.

મહિલા પાસેથી નાણાં લેવાયા ન હોવાનું સામે આવ્યું

પ્રાથમિક માહિતી મુજબ મહિલાએ નોકરી મેળવવા માટે કોઈ અરજી કરી ન હતી અને તેની પાસેથી કોઈ નાણાં લેવામાં આવ્યા હોવાનું પણ સામે આવ્યું નથી. તેમ છતાં સરકારી સંસ્થાના નામનો ઉપયોગ કરીને બનાવટી દસ્તાવેજ તૈયાર કરવાનો પ્રયાસ ગંભીર બાબત બની છે.

પાલિકાની લોકોને સાવચેત રહેવા અપીલ

આ પ્રકારની છેતરપિંડીથી બચવા પાલિકા દ્વારા લોકોને સાવચેત રહેવાની અપીલ કરવામાં આવી છે. કોઈ અજાણી વ્યક્તિ સરકારી નોકરી અપાવવાના નામે રોકડ કે ઓનલાઈન રૂપિયા માંગે તો તરત સાવધાન થવું જરૂરી છે. શંકાસ્પદ નિમણૂક પત્ર કે અન્ય સરકારી દસ્તાવેજ મળે તો તેની ખરાઈ કર્યા વિના વિશ્વાસ ન કરવો અને રિક્રૂટમેન્ટ વિભાગનો સંપર્ક કરવો જોઈએ. 

આ પણ વાંચો   :    Nepal Flood : ભયાનક પૂર વચ્ચે એકલું ઘર અડીખમ, પાણીમાં આખું ગામ તણાયું છતાં મકાન બચી ગયું જુઓ ભયાનક Video