કીમ : પ્રકાશનાં મહાપર્વ દિવાળીનાં મંગલ વધામણાં કરતા વાઘબારસ એટલે કે ગોવત્સ દ્વાદશીનાં પાવન દિવસે માંગરોળ તાલુકાનાં ઔદ્યોગિક વિસ્તાર ગણાતા મોલવણ ખાતે વિવિધ ફેક્ટરી પરિસરોમાં શાસ્ત્રોક્ત વિધિ-વિધાન અનુસાર ભાવપૂર્વક ગૌપૂજનનું સુંદર આયોજન કરવામાં આવ્યું હતું. આ અવસરે મોલવણ જીઆઇડીસીનાં અગ્રણી કિશન બાબુજી દ્વારા ગૌમાતાની પૂજા કરવામાં આવી હતી. તેમની સાથે ઔદ્યોગિક એકમોનાં સંચાલકો, વ્યવસ્થાપકો તથા શ્રમિક પરિવારો એકતાંતણે જોડાઇને પૂજા વિધિમાં સહભાગી બન્યા હતા. વહેલી સવારથી જ કારખાના પરિસરોને દીવડાઓ, રંગોળી અને આસોપાલવનાં તોરણોથી સુશોભિત કરવામાં આવ્યા હતા. ગાય અને વાછરડાનું કુમકુમ તિલક કરી, પુષ્પહાર પહેરાવી તેમજ અક્ષત ચઢાવી પૂજન કરવામાં આવ્યું હતું. પૂજા બાદ ગૌમાતાને ભાવપૂર્વક ગોળ, રોટલી અને લીલું ઘાસ અર્પણ કરાયું હતું. સૌએ આરતી ઉતારી ઉદ્યોગ-ધંધાની ઉત્તરોત્તર પ્રગતિ, કારીગરોનાં ઉત્તમ સ્વાસ્થ્ય અને સમગ્ર પંથકમાં શાંતિ તેમજ સમૃદ્ધિ જળવાઇ રહે તેવી હૃદયપૂર્વક પ્રાર્થના કરી હતી.

ગુજરાતના વધુ સમાચાર વાંચવા માટે ક્લિક કરો