કામરેજના વલણ ગામની હદમાં પરબ-વલણ રોડ પર આવેલી જાણીતી ઓમ ટેક્સટાઇલ મિલમાં અચાનક આગ ભભૂકી ઊઠતાં ભારે દોડધામ મચી ગઈ હતી. પ્રાપ્ત માહિતી અનુસાર મિલના ટેક્સ્ચ્યરાઇઝિંગ અને વેલ્વેટ બનાવવાના વિભાગમાં અચાનક તણખો ઝર્યા બાદ આગે ગણતરીની મિનિટોમાં વિકરાળ સ્વરૂપ ધારણ કરી લીધું હતું. જોકે વેલ્વેટના ઉત્પાદનમાં પેટ્રોકેમિકલ આધારિત કાચા માલનો ઉપયોગ થતો હોવાથી આગ અત્યંત ઝડપથી સમગ્ર યુનિટમાં પ્રસરી ગઇ હતી અને કાળા ડિબાંગ ધુમાડાના ગોટેગોટા આકાશમાં ઘણા કિલોમીટર દૂર સુધી જોવા મળ્યા હતા. ઘટનાની જાણ થતા જ ફાયર વિભાગનો કાફલો તાત્કાલિક ધોરણે બનાવના સ્થળે દોડી આવ્યો હતો. ફાયર ફાઇટરોએ પરિસ્થિતિની ગંભીરતાને પારખીને પાણી અને ખાસ કેમિકલ ફોમનો સતત મારો ચલાવી આગને વધુ પ્રસરતી અટકાવી હતી. સદનસીબે આ દુર્ઘટનામાં કોઇ જાનહાનિ થઇ નથી, જેનાથી તંત્ર અને મિલ સંચાલકોએ રાહતનો દમ લીધો હતો. ફાયર ટીમે અંદર ફરીથી તણખા ન ભડકે તે માટે સ્થળ પર કૂલિંગની સઘન કામગીરી હાથ ધરી હતી.

ગુજરાતના વધુ સમાચાર વાંચવા માટે ક્લિક કરો