Surat: સચિન સ્ટેશન નજીક વંદે ભારત એક્સપ્રેસ પર પથ્થરમારો; C-4 કોચની બારીનો બહારનો કાચ તૂટ્યો

📅 Published: November 18, 2026 | 📂 Category: Surat

દેશની પ્રીમિયમ ટ્રેન ગણાતી વંદે ભારત એક્સપ્રેસ પર વધુ એક વખત પથ્થરમારાની ઘટના સામે આવી છે. સુરત અને નવસારી વચ્ચે સચિન રેલવે સ્ટેશન નજીક ગાંધીનગરથી મુંબઈ જતી વંદે ભારત એક્સપ્રેસ (ટ્રેન નંબર 20902) પર અજાણ્યા શખ્સ દ્વારા પથ્થરમારો કરવામાં આવ્યો હતો. મંગળવારે સાંજે અંદાજે 5:23 વાગ્યાના સુમારે બનેલી આ ઘટનાને પગલે ટ્રેનમાં સવાર મુસાફરોમાં થોડીવાર માટે ભારે અફરાતફરી અને ફફડાટનો માહોલ સર્જાયો હતો.

વંદે ભારત એક્સપ્રેસ પર પથ્થરમારાની ઘટના

મળતી વિગતો અનુસાર, ચાલતી ટ્રેન પર અજાણ્યા શખ્સે વંદે ભારત એક્સપ્રેસના C-4 કોચને નિશાન બનાવીને જોરદાર પથ્થર ફેંક્યો હતો. પથ્થર વાગવાના તીવ્ર અવાજથી કોચમાં બેઠેલા મુસાફરો ચોંકી ઉઠ્યા હતા. પથ્થર વાગવાના કારણે C-4 કોચની બારીનો બહારનો કાચ તૂટી ગયો હતો. જોકે, સદનસીબે બારીનો અંદરનો કાચ સંપૂર્ણપણે સલામત રહેતા કોચમાં બેઠેલા કોઈ પણ મુસાફરને ઈજા પહોંચી ન હતી અને મોટી જાનહાનિ ટળી હતી.

RPF અને રેલવે અધિકારીઓ ઘટનાસ્થળે

ઘટનાની જાણ થતાં જ રેલવે પ્રોટેક્શન ફોર્સ (RPF) અને રેલવે વિભાગના ઉચ્ચ અધિકારીઓ તાત્કાલિક સ્થળ પર દોડી ગયા હતા અને નુકસાનનું નિરીક્ષણ કર્યું હતું. રેલવે તંત્ર દ્વારા આ મામલે અજાણ્યા શખ્સ વિરુદ્ધ ગુનો નોંધીને સઘન તપાસ શરૂ કરવામાં આવી છે. ચાલતી ટ્રેન પર પથ્થરમારો કરીને મુસાફરોના જીવ જોખમમાં મૂકનાર આરોપીને વહેલી તકે ઝડપી પાડવા માટે RPF દ્વારા આસપાસના વિસ્તારમાં શોધખોળ અને પૂછપરછની કાર્યવાહી તેજ કરવામાં આવી છે.

આ પણ વાંચો: Rajkot: વિછીયાના છાસીયા ગામની સીમમાં લહેરાતું ગાંજાનું વાવેતર ઝડપાયું, SOGએ ₹3.52 કરોડનો મુદ્દામાલ જપ્ત કર્યો


📱 Share on WhatsApp 🌐 View Original Article

Leave a Reply

Your email address will not be published. Required fields are marked *