સુરત મહાનગરપાલિકા સંચાલિત સ્મીમેર (SMIMER) મેડિકલ કોલેજની ગર્લ્સ હોસ્ટેલમાં મોડી રાત્રે અચાનક ભારે અફરાતફરી અને ગભરાટનો માહોલ સર્જાયો હતો. હોસ્ટેલમાં રહીને એમબીબીએસના પ્રથમ વર્ષમાં અભ્યાસ કરતી 18 વર્ષીય વિદ્યાર્થિનીને અચાનક આત્મહત્યાના તીવ્ર વિચારો આવવા લાગ્યા હતા અને તેણે પોતે ઝેરી દવા પી લીધી હોવાનો ભ્રમ થતાં જ હોસ્ટેલ સ્ટાફ અને અન્ય વિદ્યાર્થીનીઓમાં દોડધામ મચી ગઈ હતી. જોકે, હોસ્ટેલ પ્રશાસન, સિનિયર ડોક્ટર્સ અને મનોચિકિત્સકોની સમયસૂચકતાના કારણે તાત્કાલિક સારવાર અને સઘન કાઉન્સેલિંગ શરૂ કરી દેવાતાં એક મોટી સંભવિત દુર્ઘટના ટળી ગઈ છે.
મોબાઈલ જોતાં જોતાં ડિપ્રેશનનો એટેક
18 વર્ષીય તબીબી વિદ્યાર્થિની છેલ્લા કેટલાક સમયથી ગંભીર માનસિક તણાવ અને ડિપ્રેશનથી પીડાતી હોવાથી તેની નિયમિત મનોચિકિત્સકીય સારવાર ચાલી રહી હતી.રાત્રિના સમયે રૂમમાં બેસી મોબાઈલ જોઈ રહી હતી તે દરમિયાન એકાએક તેના મનમાં આત્મહત્યાના અત્યંત તીવ્ર વિચારો શરૂ થયા હતા. આ ગભરાટ અને પેનિક એટેક વચ્ચે તેને એવો ભ્રમ થઈ ગયો કે તેણે જીવલેણ દવા ગટગટાવી લીધી છે. વિદ્યાર્થિનીએ ગભરાટમાં આ અંગે આસપાસની સહપાઠીઓને જાણ કરતાં જ હોસ્ટેલ મેનેજમેન્ટ અને સિક્યોરિટીમાં હલચલ મચી ગઈ હતી.
મેડિકલ તપાસમાં મોટો ખુલાસો
સ્થિતિની ગંભીરતા જોતાં હોસ્ટેલ રેક્ટર અને સિનિયર રેસિડેન્ટ તબીબોએ સમય બગાડ્યા વિના વિદ્યાર્થિનીને તાત્કાલિક સ્મીમેર હોસ્પિટલના ઈમરજન્સી વોર્ડમાં ખસેડી હતી.ઘટનાની જાણ થતાં જ વરાછા/સહિત સ્થાનિક પોલીસ કાફલો પણ હોસ્પિટલ પહોંચ્યો હતો અને કાયદેસરની મેડિકો-લીગલ કેસ (MLC) ની નોંધ કરવામાં આવી હતી.તબીબો દ્વારા કરાયેલા પ્રાથમિક શારીરિક પરીક્ષણો, બ્લડ રિપોર્ટ્સ અને ઝેરી અસરના ટેસ્ટિંગમાં સ્પષ્ટ થયું હતું કે વિદ્યાર્થિનીએ વાસ્તવમાં કોઈ દવા કે ઝેરી પદાર્થનું સેવન કર્યું જ નહોતું; તે માત્ર માનસિક ડિલ્યુઝન અને પેનિક એટેકનો ભોગ બની હતી.
મનોચિકિત્સકો દ્વારા સઘન કાઉન્સેલિંગ, તબિયત સંપૂર્ણ સ્થિર
સાચું કારણ સામે આવ્યા બાદ સ્મીમેર હોસ્પિટલના મનોચિકિત્સા વિભાગના સિનિયર તબીબો દ્વારા તાબડતોબ વિદ્યાર્થિનીનું વિગતવાર કાઉન્સેલિંગ સેશન શરૂ કરવામાં આવ્યું હતું. પરિવારજનોને પણ સમગ્ર ઘટના અંગે વાકેફ કરવામાં આવ્યા છે. યોગ્ય સારવાર, સાંત્વના અને સુરક્ષિત વાતાવરણ પૂરું પાડવામાં આવતાં હાલ વિદ્યાર્થિનીની માનસિક અને શારીરિક સ્થિતિ સંપૂર્ણપણે સ્થિર અને ભયમુક્ત હોવાનું કોલેજ ડીન અને તબીબી સૂત્રોએ જણાવ્યું છે.