સુરત જિલ્લાના કતારગામ સ્થિત શિશુ ગૃહમાં ઉછરી રહેલા બે બાળકોને હવે અમેરિકામાં નવું જીવન મળશે.ન્યૂયોર્ક ખાતે રહેતા મૂળ ગુજરાતી દંપતી દ્વારા કાયદાકીય પ્રક્રિયાઓ પૂર્ણ કરી દેવામાં આવી છે.આ દંપતીને સત્તાવાર પ્રી-એડોપ્શન લેટર સોંપાયા છે.સુરત જિલ્લામાંથી સરેન્ડર કરાયેલા આ બાળકો હવે વિદેશમાં નવા પરિવાર સાથે રહેશે.કાયદાકીય પ્રક્રિયાના ભાગરૂપે તમામ જરૂરી ચકાસણી પૂર્ણ થયા બાદ બાળકોને મોકલવાની મંજૂરી અપાઈ છે.પરિવારની હૂંફ મેળવીને બાળકો હવે સુખી જીવન જીવશે.

ઉજ્જવળ ભવિષ્ય સાથે નવી જિંદગી શરૂ થશે

સુરત જિલ્લામાંથી સરેન્ડર કરાયેલા આ બંને બાળકો કતારગામ શિશુ ગૃહ ખાતે સુરક્ષિત આશ્રય મેળવીને ઉછરી રહ્યા હતા.સંસ્થામાં તેમના યોગ્ય પાલન-પોષણ વચ્ચે તેમને કાયમી પરિવાર મળે તે માટે સતત પ્રયાસો હાથ ધરાયા હતા.આ દરમિયાન અમેરિકાના ન્યૂયોર્ક નિવાસી મૂળ ગુજરાતી દંપતીએ આ બાળકોને દત્તક લેવા માટે તૈયારી દર્શાવી હતી. બાળક દત્તક લેવાની તમામ કાયદાકીય પ્રક્રિયાઓ નિયમ મુજબ પૂર્ણ કરવામાં આવી હતી.તમામ વૈધાનિક તબક્કા સફળતાપૂર્વક પૂરા થયા બાદ દંપતીને સત્તાવાર પ્રી-એડોપ્શન લેટર સોંપવામાં આવ્યા છે.આ પ્રક્રિયા સંપન્ન થતાં હવે આ બાળકો પોતાના નવા અમેરિકન માતા-પિતા સાથે ન્યૂયોર્કમાં રહેશે. શિશુ ગૃહમાં ઉછરેલા આ બાળકો માટે હવે વિદેશમાં સર્વાંગી વિકાસ અને ઉજ્જવળ ભવિષ્ય સાથે નવી જિંદગી શરૂ થશે. 

ન્યૂયોર્કના દંપતીને બે બાળકો સોંપાતાં મોટો આનંદ છવાયો

કતારગામ શિશુ ગૃહ માટે દિવાળી પછીનો સમયગાળો બાળકોના પુનર્વસન સંદર્ભે અત્યંત ફળદાયી સાબિત થયો છે.દિવાળી બાદ પુણે,મુંબઈ અને હવે અમેરિકાના દંપતીઓને બાળકની ભેટ મળી છે.સંસ્થા દ્વારા અગાઉ પુણેના દંપતીને બાળક સોંપાયું હતું અને ત્યારપછી મુંબઈના દંપતીને પણ વિધિવત રીતે બાળક સોંપવામાં આવ્યું હતું.હવે આ શ્રેણીમાં અમેરિકાના ન્યૂયોર્કના દંપતીને બે બાળકો સોંપાતાં મોટો આનંદ છવાયો છે.છેલ્લા એક મહિનામાં કુલ 4 બાળકો માટે દત્તક પ્રક્રિયા સફળતાપૂર્વક સંપન્ન થઈ ચૂકી છે.સુરત જિલ્લાના આ શિશુ ગૃહમાંથી નિયમાનુસાર કરાયેલી કાર્યવાહીથી બાળકોને ઉત્તમ વાલીઓ મળ્યા છે.વિદેશ તેમજ દેશના અન્ય શહેરોમાં વસતા પરિવારોમાં જઈને આ બાળકો હવે પોતાનો સુંદર ઉછેર મેળવશે.આ પ્રકારની સફળ કામગીરીથી બાળકોના જીવનમાં નવી આશાનો સંચાર થયો છે અને તેઓનું ભવિષ્ય સુરક્ષિત બન્યું છે.શિશુ ગૃહમાં રહેતા બાળકોને યોગ્ય ઘર અને પરિવાર મળવાથી સૌએ હર્ષ વ્યક્ત કર્યો છે.

આ પણ વાંચોઃ Bhavnagar News: હત્યા કેસનો આરોપી પોલીસ જાપ્તામાંથી ફરાર થતાં હોસ્પિટલમાં નીચે પટકાયો