સુરત જિલ્લામાંથી પસાર થતા એક્સપ્રેસ વે પર કામરેજ નજીક એક અત્યંત ગમખ્વાર અકસ્માત સર્જાયો છે.રોડની બાજુમાં ઊભેલા એક ડમ્પર પાછળ પૂરપાટ ઝડપે આવી રહેલી કાર ઘૂસી ગઈ હતી.આ અકસ્માત એટલો ભયાનક હતો કે કારમાં સવાર ચાર લોકોના ઘટનાસ્થળે જ કમકમાટીભર્યા મોત નીપજ્યા છે. જેના કારણે સમગ્ર હાઈવે પર અરેરાટી વ્યાપી ગઈ છે.

ટેકનિકલ ખામી સર્જાતા વાહન રોકાયું હતું

પ્રાપ્ત થતી વિગતો અનુસાર,ડમ્પરના ચાલકે વાહનમાં અચાનક એર પ્રેશરની ગંભીર સમસ્યા ઊભી થવાના કારણે વાહન એક્સપ્રેસ વે પર જ ઊભું રાખવું પડ્યું હતું. સામાન્ય રીતે હાઇવે કે એક્સપ્રેસ વે પર વાહન અચાનક બંધ પડે ત્યારે પૂરતી સાવચેતી રાખવી અનિવાર્ય બનતી હોય છે.પરંતુ આ દરમિયાન પાછળથી પૂરઝડપે આવી રહેલી હેરિયર કાર અચાનક ઊભેલા આ ડમ્પર પાછળ ઘૂસી ગઈ હતી.ટક્કર એટલી જોરદાર હતી કે કારનો આગળનો ભાગ કૂચડો વળી ગયો હતો અને કારમાં સવાર ચારેય લોકોના પ્રાણ પંખેરૂ ઉડી ગયા હતા.

પોલીસે સ્થળ પર પહોંચી તાત્કાલિક કાર્યવાહી હાથ ધરી

આ ભયાનક અકસ્માતના પગલે એક્સપ્રેસ વે પર થોડીવાર માટે ટ્રાફિકજામ જેવી સ્થિતિ સર્જાઈ હતી.આ દુર્ઘટનાની જાણ થતા જ કામરેજ પોલીસ સ્ટેશનનો કાફલો તાત્કાલિક ધોરણે ઘટનાસ્થળે દોડી આવ્યો હતો.પોલીસે સ્થાનિક લોકો અને રાહદારીઓની મદદથી તાત્કાલિક કામગીરી હાથ ધરી હતી તેમજ એક્સપ્રેસ વે પર રોકાયેલા ટ્રાફિકને પૂર્વવત કરાવ્યો હતો.પોલીસે મૃતકોના મૃતદેહને પોસ્ટમોર્ટમ અર્થે નજીકની હોસ્પિટલમાં ખસેડવાની તજવીજ હાથ ધરી છે અને અકસ્માત કયા સંજોગોમાં સર્જાયો તથા તેમાં કોઈની બેદરકારી હતી કે કેમ તે દિશામાં સઘન તપાસ શરૂ કરી છે.

આ હાઈવે પર વારંવાર નાના મોટા અકસ્માતો સર્જાતા હોય છે

આ એક્સપ્રેસ વે પર અવારનવાર નાના-મોટા અકસ્માતના બનાવો બનતા રહે છે.હાઈવે ઓથોરિટી અને ટ્રાફિક વિભાગ દ્વારા સમયાંતરે માર્ગ સલામતી અંગે જાગૃતિ ફેલાવવામાં આવતી હોય છે.છતાં ડ્રાઇવરોની લાપરવાહી કે ટેકનિકલ ખામીઓને કારણે આવા જીવલેણ બનાવો અટકી રહ્યા નથી.આ હૃદયદ્રાવક ઘટનાએ વધુ એકવાર હાઈવે પર હંકારતી વખતે વાહનચાલકોએ રાખવી પડતી સાવચેતી,સ્પીડ લિમિટનું પાલન અને ઇમરજન્સી પાર્કિંગ વખતે રાખવાના સુરક્ષા ધોરણોનું પાલન કેટલું આવશ્યક છે તેની ગંભીર યાદ અપાવી છે.