સુરત જિલ્લાના પલસાણા તાલુકામાં એક અત્યંત દર્દનાક અકસ્માતની ઘટના સામે આવી છે. સાકી ગામથી ચલથાણ તરફ જતી નહેર પરથી રાત્રિના સમયે પસાર થઈ રહેલા બે મોટરસાઇકલ સવારો અચાનક બાઇક પરનો કાબૂ ગુમાવતાં સીધા ઊંડી નહેરમાં ખાબક્યા હતા. અંધારાના કારણે આ સર્જાયેલી દુર્ઘટનામાં નહેરના પાણીના ઝડપી પ્રવાહમાં તણાઈ જવાથી બંને બાઇક સવાર મિત્રોના કરુણ મોત નીપજ્યા છે.

ફાયર બ્રિગેડ દ્વારા શોધખોળ શરૂ

ઘટના અંગે સ્થાનિક રહીશોને જાણ થતાં જ તેમણે તાત્કાલિક પલસાણા પોલીસ અને બારડોલી ફાયર બ્રિગેડની ટીમને જાણ કરી હતી. ઘટનાસ્થળે પહોંચેલી ફાયર બ્રિગેડના જવાનોએ નહેરમાં ઉતરીને ત્વરિત રેસ્ક્યૂ કામગીરી અને શોધખોળ હાથ ધરી હતી. સઘન શોધખોળ દરમિયાન નહેરમાંથી દુર્ઘટનાગ્રસ્ત બાઇક મળી આવી હતી, જ્યારે બંને યુવકોના કમનસીબ મોત થતાં તેમના મૃતદેહોને બહાર કાઢવા ફાયર વિભાગે વધુ શોધખોળ આદરી હતી.

ગામમાં છવાઈ ઘેરા શોકની લાગણી

નહેરમાં ખાબકીને જીવ ગુમાવનારા બંને મૃતક યુવાનોની ઓળખ વાંકાનેડા ગામના રહેવાસી 20 વર્ષીય શુભમ સુધકર ગાયકવાડ અને 20 વર્ષીય દિપક પ્રેમસીંગ રાજપૂત તરીકે થઈ છે. બંને યુવકો એકસાથે રાત્રિના સમયે બાઇક પર જઈ રહ્યા હતા ત્યારે આ કાળમુખો અકસ્માત નડ્યો હતો. એક જ ગામના બે આશાસ્પદ યુવાનોના અકાળે અવસાનથી વાંકાનેડા ગામ સહિત સમગ્ર પંથકમાં ઘેરા શોકની કાલિમા છવાઈ ગઈ છે. પલસાણા પોલીસે આ મામલે આગળની કાયદેસરની તપાસ હાથ ધરી છે.

ગુજરાતના વધુ સમાચાર વાંચવા માટે ક્લિક કરો