સુરત જિલ્લાના ગ્રામ્ય વિસ્તારોમાં તસ્કર ટોળકી ફરી એકવાર સક્રિય થતાં રહીશોમાં ભારે ફાળચો વ્યાપી ગયો છે. માંગરોળ તાલુકામાં આવેલા વાંકલ ગામની ‘વિશ્વાસ રેસિડેન્સી’માં તસ્કરોએ બંધ મકાનને નિશાન બનાવીને મોટી ચોરીને અંજામ આપ્યો છે. મકાનમાલિક પરિવાર સાંજના સમયે કામ અર્થે સુરત ગયો હતો, તે જ સમયગાળા દરમિયાન તસ્કરોએ તકનો લાભ ઉઠાવી મકાનમાં પ્રવેશ કર્યો હતો.

ઘરનો નકુચો તોડી લાખોની મત્તા ચોરાઈ

રાત્રિના સમયે તસ્કરોએ ઘરના મુખ્ય દરવાજાનો નકુચો તથા તાળું તોડીને અંદર પ્રવેશ કર્યો હતો. ઘરમાં મૂકેલી રોકડ રકમ તેમજ સોના-ચાંદીના કિંમતી ઘરેણાં સહિત કુલ રૂ.4 લાખથી વધુની મત્તા ચોરીને તસ્કરો આસાનીથી ફરાર થઈ ગયા હતા. પરિવારજનો પરત ફરતા ઘરનો સામાન વેરવિખેર જોઈને ચોરી થઈ હોવાની જાણ થઈ હતી.

પોલીસ કાફલો ઘટનાસ્થળે, તપાસ શરૂ

ચોરીની આ ઘટના અંગે જાણ કરાતાં જ સ્થાનિક પોલીસનો કાફલો તાત્કાલિક ઘટનાસ્થળે દોડી આવ્યો હતો. પોલીસે ફિંગરપ્રિન્ટ નિષ્ણાતો અને ડોગ સ્ક્વોડની મદદથી સ્થળ તપાસ હાથ ધરી છે. આસપાસના વિસ્તારમાં લાગેલા સીસીટીવી (CCTV) ફૂટેજ ચકાસીને તસ્કર ટોળકીનું સુરાગ મેળવવા અને આરોપીઓને ઝડપી પાડવા પોલીસે કાયદેસરની તપાસ તેજ કરી છે.

ગુજરાતના વધુ સમાચાર વાંચવા માટે ક્લિક કરો