સુરત શહેરમાં છેલ્લા બે દિવસથી વરસાદે વિરામ લીધો હતો, જેના કારણે અસહ્ય ગરમી અને બફારાથી શહેરીજનો ત્રાહિમામ પોકારી ઊઠ્યા હતા. પરંતુ આજે વાતાવરણમાં અચાનક પલટો આવ્યો છે અને સમગ્ર સુરત શહેરમાં ફરી એકવાર મેઘરાજાનું ધમાકેદાર આગમન થયું છે. શહેરના પાલ, અડાજણ, રાંદેર, અઠવાલાઇન્સ, વેસુ અને પીપલોદ જેવા પોશ તેમજ શહરી વિસ્તારોમાં ધોધમાર વરસાદ વરસી રહ્યો છે.

ગરમીથી મળી મુક્તિ, વાતાવરણમાં ઠંડક પ્રસરી

વરસાદની તોફાની એન્ટ્રી થતાં જ વાતાવરણમાં ભારે ઠંડક પ્રસરી ગઈ છે, જેનાથી સુરતીઓને અસહ્ય ગરમી અને અકળાવનારા બફારામાંથી મોટી રાહત મળી છે. માર્ગો પર પાણી વહેતા થઈ ગયા છે અને વાહનચાલકો તેમજ સ્થાનિક રહીશોએ અચાનક આહલાદક બનેલા હવામાનનો આનંદ માણ્યો હતો. બે દિવસ બાદ વરસેલા આ વરસાદથી શહેરના તાપમાનમાં પણ નોંધપાત્ર ઘટાડો નોંધાયો છે.

દક્ષિણ ગુજરાતમાં 2 દિવસ ઓરેન્જ એલર્ટ

ઉલ્લેખનીય છે કે, ભારતીય હવામાન વિભાગ (IMD) દ્વારા સુરત સહિત સમગ્ર દક્ષિણ ગુજરાતમાં બે દિવસ માટે ઓરેન્જ એલર્ટ જાહેર કરવામાં આવ્યું હતું. હવામાન વિભાગની આ આગાહી મુજબ જ સુરત શહેરમાં અનરાધાર વરસાદ વરસી રહ્યો છે. તંત્ર દ્વારા નીચાણવાળા વિસ્તારો અને ટ્રાફિક વ્યવસ્થા પર નજર રાખવામાં આવી રહી છે, જ્યારે આગામી સમયમાં પણ ભારે વરસાદી ઝાપટાં પડવાની શક્યતા દર્શાવવામાં આવી છે.

આ પણ વાંચો : Bharuch News : અંકલેશ્વરના સાળંગપુર નજીક નશાના કારણે 3 યુવાનોના મોતની આશંકા, 1 ની તબિયત ગંભીર