સુરત શહેર અને સમગ્ર જિલ્લામાં છેલ્લા એક મહિનાથી વ્યાપેલા લાંબા વિરામ બાદ આખરે વરસાદી માહોલ બરાબરનો જામ્યો છે. વહેલી સવારથી જ આકાશમાં કાળાડિબાંગ વાદળો ઘેરાયા હતા અને જોતજોતામાં સમગ્ર શહેરમાં સાર્વત્રિક ધોધમાર વરસાદ શરૂ થઈ ગયો હતો. હવામાન વિભાગ દ્વારા સુરત જિલ્લા માટે ઓરેન્જ એલર્ટ જાહેર કરવામાં આવ્યું છે અને ભારેથી અતિભારે વરસાદની આગાહી વ્યક્ત કરવામાં આવી છે, જેને પગલે સમગ્ર વિસ્તારમાં મેઘમહેર જોવા મળી રહી છે.
અઠવાલાઇન, વરાછા, કતારગામ સહિતના વિસ્તારો ભીંજાયા
સુરત શહેરના લગભગ તમામ વિસ્તારોમાં એકસાથે મુસળધાર વરસાદ તૂટી પડ્યો હતો. શહેરના અઠવાલાઇન, પાર્લે પોઇન્ટ, પીપલોદ, મજુરા ગેટ, નાનપુરા, ઉમરા અને વેસુ જેવા પોશ વિસ્તારો તેમજ અડાજણ, રાંદેર, કતારગામ, વરાછા, ઉધના અને ડીંડોલી સહિતના વિસ્તારોમાં પણ પાણી વહી નીકળ્યા હતા. સતત વરસી રહેલા વરસાદી ઝાપટાંને કારણે શહેરના મુખ્ય માર્ગો ભીંજાયા હતા અને નીચાણવાળા વિસ્તારોમાં વરસાદી પાણી ફરી વળ્યા હતા.
બફારાથી રાહત અને ધરતીપુત્રોમાં ખુશીની લહેર
છેલ્લા એક મહિનાથી વરસાદ ગાયબ રહેતાં શહેરીજનો અસહ્ય ગરમી અને બફારાથી તોબા પોકારી ઉઠ્યા હતા, પરંતુ આ ધોધમાર વરસાદને પગલે સમગ્ર શહેરમાં આહલાદક ઠંડક પ્રસરી ગઈ છે. બીજી તરફ, લાંબા સમયથી વરસાદની વાટ જોઈ રહેલા ખેડૂતો માટે આ વરસાદ અમૃત સમાન સાબિત થયો છે. પાકને નવું જીવન મળતાં સુરત જિલ્લાના ધરતીપુત્રો અને ખેડૂત આલમમાં ખુશી અને આનંદની લહેર દોડી ગઈ છે.