સુરેન્દ્રનગર જિલ્લામાં કાયદો અને વ્યવસ્થાની સ્થિતિને વધુ મજબૂત બનાવતી LCB પોલીસે બાતમીના આધારે એક મોટી સફળતા હાંસલ કરી છે. ધ્રાંગધ્રા-માલવણ હાઈવે પરથી પસાર થઈ રહેલી એક શંકાસ્પદ કારને પોલીસે અટકાવી હતી. આ વાહનની સઘન તપાસ કરતા અંદરથી વિદેશી દારૂનો મોટો જથ્થો મળી આવ્યો હતો, જેનાથી બુટલેગરોમાં ભારે ફફડાટ ફેલાઈ ગયો છે.
લાખો રૂપિયાનો મુદ્દામાલ જપ્ત
પોલીસ તપાસ દરમિયાન કારમાંથી ઈંગ્લીશ દારૂની 1632 બોટલ તેમજ 360 બીયર ટીન મળી આવ્યા હતા. પોલીસે દારૂ ઉપરાંત ક્રેટા કાર અને મોબાઈલ ફોન સહિત કુલ રૂ.7,13,200 નો અંદાજિત મુદ્દામાલ જપ્ત કર્યો છે. આ કાર્યવાહીથી ગેરકાયદેસર પ્રવૃત્તિઓ ચલાવનાર તત્વોને મોટો આંચકો લાગ્યો છે.
રાજસ્થાનનો શખ્સ ઝડપાયો
આ કેસમાં પોલીસે રાજસ્થાનના બાડમેર જિલ્લાના રહેવાસી જસવંતસિંહ ઉગમસિંહ પરમાર નામના શખ્સને સ્થળ પરથી જ ઝડપી લીધો છે. પ્રાથમિક પૂછપરછમાં આ જથ્થો ક્યાંથી લાવવામાં આવ્યો હતો, અને કોને આપવાનો હતો તે અંગે અનેક મહત્વના ખુલાસા થવાની શક્યતા છે.
મોકલનાર અને મંગાવનાર સામે ગુનો
સુરેન્દ્રનગર એલસીબી પોલીસે માત્ર ડ્રાઈવરની જ ધરપકડ નથી કરી, પરંતુ આ ગેરકાયદેસર ધંધાના મુખ્ય સૂત્રધારો સુધી પહોંચવા કવાયત શરૂ કરી છે. દારૂનો આ જથ્થો મોકલનારા અને મંગાવનારા ઈસમો બંને વિરુદ્ધ કાયદેસરની ગુનાહિત કાર્યવાહી નોંધીને આગળની સઘન તપાસ હાથ ધરી છે.
આ પણ વાંચો: Surendranagar News: એસટી બસમાં નશાની હેરાફેરીનો પર્દાફાશ, પોશડોડાના જથ્થા સાથે એક ઝડપાયો