વાવ-થરાદ પંથકમાં મીઠા-થરાદ હાઈવે પર જાંદલા ગામ નજીક એક ચાલતી ઈકો કારમાં અચાનક ભીષણ આગ લાગવાની ઘટના સામે આવી છે. હાઈવે પર કાર દોડી રહી હતી તે દરમિયાન અચાનક બોનેટમાંથી ધુમાડા સાથે આગના લપેટા નીકળવા લાગ્યા હતા. જોકે, આગ લાગતાં જ કાર ચાલકે સમયસૂચકતા વાપરીને તાત્કાલિક કારમાંથી બહાર નીકળી જતાં તેમનો આબાદ બચાવ થયો હતો.

ફાયર બ્રિગેડની ટીમે સ્થળ પર પહોંચી 

ઘટનાને પગલે હાઈવે પરથી પસાર થતા સ્થાનિકો અને રાહદારીઓએ ત્વરિત થરાદ નગરપાલિકાની ફાયર ટીમ તેમજ 112ની પોલીસ ટીમને જાણ કરી હતી. માહિતી મળતા જ ફાયર બ્રિગેડ અને પોલીસ કાફલો તાત્કાલિક ઘટનાસ્થળે દોડી આવ્યો હતો. ફાયર ટીમે પાણીનો મારો ચલાવીને આગ પર કાબૂ મેળવ્યો હતો, પરંતુ તે પહેલાં જ ઈકો કાર સંપૂર્ણપણે બળીને ખાખ થઈ ગઈ હતી.

આગનું ચોક્કસ કારણ હજુ સુધી અકબંધ

અચાનક બનેલી આ ઘટનામાં સદનસીબે કોઈ જાનહાનિ ન થતાં તંત્ર અને સ્થાનિકોએ રાહતનો શ્વાસ લીધો હતો. ચાલકની સમયસૂચકતાને કારણે એક મોટી દુર્ઘટના ટળી હતી. જોકે, દોડતી ઈકો કારમાં આગ કયા કારણોસર લાગી તે અંગેનું ચોક્કસ કારણ હજુ સુધી જાણી શકાયું નથી અને તે અકબંધ રહ્યું છે.

ગુજરાતના વધુ સમાચાર વાંચવા માટે ક્લિક કરો