ઉત્તર પ્રદેશના પ્રયાગરાજ શહેરમાં સતત થઈ રહેલા ભારે વરસાદ અને બેકાબૂ કુદરતી પ્રકોપને કારણે ગંગા અને યમુના નદીઓનું જળસ્તર ભયજનક સપાટીએ પહોંચી ગયું છે. બંને નદીઓના પાણી ખતરાના નિશાનની આસપાસ વહી રહ્યા છે, જેના કારણે સમગ્ર સંગમ વિસ્તાર અને નીચાણવાળા વિસ્તારો પાણીમાં ગરકાવ થઈ ગયા છે. આ પૂરની સ્થિતિએ સામાન્ય જનજીવનને સંપૂર્ણપણે અસ્તવ્યસ્ત કરી નાખ્યું છે.

રસ્તાઓ પર દોડી રહી છે હોડીઓ

સામાન્ય દિવસોમાં જ્યાં હજારો વાહનો અને રાહદારીઓની અવરજવર રહેતી હતી, તે સંગમના રસ્તાઓ પર હવે નાની-મોટી હોડીઓ દોડી રહી છે. પાણીનું સ્તર એટલું વધી ગયું છે કે લોકો રસ્તાઓ પર જ પાણીમાં સ્નાન કરવા મજબૂર બન્યા છે. પૂરના આ પાણી પ્રખ્યાત લટ્ટે હનુમાન મંદિરની સીમાઓ સુધી પહોંચી ગયા છે. મંદિર પરિસરમાં અને આસપાસના વિસ્તારોમાં પાણી ભરાઈ જવાથી પૂજારીઓ, પંડિતો અને યાત્રાળુઓ પોતાના કિંમતી સામાન અને સામગ્રીને સુરક્ષિત રીતે ઊંચા અને સલામત સ્થળો પર ખસેડી રહ્યા છે.

રેલવે વ્યવહાર પર માઠી અસર

શહેરમાં પ્રવર્તી રહેલી આ પૂર જેવી પરિસ્થિતિને કારણે પરિવહન સેવાઓ પણ ગંભીર રીતે પ્રભાવિત થઈ છે. ઉત્તર પૂર્વીય રેલવેના રામબાગ સ્ટેશન પર પાટા અને યાર્ડ પાણીમાં ડૂબી ગયા છે. સ્ટેશન નીચાણવાળા વિસ્તારમાં હોવાથી ત્યાં સતત પાણી ભરાઈ રહ્યું છે. આ કારણોસર રેલવે તંત્ર દ્વારા રામબાગથી ચાલતી ચાર મહત્વપૂર્ણ પેસેન્જર ટ્રેનોનું સંચાલન અસ્થાયી ધોરણે ઝુંસી સ્ટેશન તરફ વાળી દેવામાં આવ્યું છે. જોકે, રાહતની વાત એ છે કે ઉત્તર મધ્ય રેલવેના મુખ્ય જનસંપર્ક અધિકારીના જણાવ્યા અનુસાર પ્રયાગરાજ જંકશન, નૈની અને પ્રયાગરાજ છીકી સ્ટેશનો પર હજુ સુધી પાણી ભરાયાના કોઈ અહેવાલ નથી અને ત્યાં ટ્રેનો સમયપત્રક મુજબ દોડી રહી છે.

હાઈકોર્ટની સખત નોટિસ

શહેરમાં ઠેર-ઠેર ભરાયેલા પાણી અને વહીવટી તંત્રની બેદરકારી સામે અલ્હાબાદ હાઈકોર્ટે ગંભીર નોંધ લીધી છે. કોર્ટે જિલ્લા વહીવટીતંત્ર અને મ્યુનિસિપલ કોર્પોરેશનના અધિકારીઓને આડેહાથ લઈને કડક ઠપકો આપ્યો છે. શહેરમાં ડ્રેનેજ સિસ્ટમની ખરાબ હાલત પર નારાજગી વ્યક્ત કરતા કોર્ટે વત્વિતંત્રને તાત્કાલિક ધોરણે પાણી નિકાલની યોગ્ય વ્યવસ્થા સુનિશ્ચિત કરવા અને નાગરિકોને રાહત આપવા માટે સખત આદેશો જારી કર્યા છે.

આ પણ વાંચોઃ Sanwariya Seth પર ભક્તોની ધનવર્ષા, ભંડારમાંથી મળ્યા ₹35.66 કરોડ અને ટનબંધ ચાંદી-સોનું