જો તમે આગામી સમયમાં વિદેશ ફરવા જવાનું વિચારી રહ્યા છો અને ખાસ કરીને દુબઈ કે સિંગાપોર જવાની તૈયારી કરી રહ્યા છો, તો આ સમાચાર તમારા માટે ઉપયોગી છે. હવે દુબઈ અને સિંગાપોરમાં પણ ભારતીય પેમેન્ટ સિસ્ટમ UPI દ્વારા ચુકવણી કરી શકાશે. દુબઈમાં UPIની મદદથી બુર્જ ખલીફાની ટિકિટ બુક કરી શકાશે. તો સિંગાપોરમાં યુનિવર્સલ સ્ટુડિયોની ટિકિટ પણ બુક કરી શકાશે.

ખાસ વાત એ છે કે હવે ત્યાં ગયા પછી ભારતીય પ્રવાસીઓએ વિદેશી કાર્ડ કે અન્ય આંતરરાષ્ટ્રીય પેમેન્ટ વિકલ્પો પર આધાર રાખવો નહીં પડે. નાણાં મંત્રાલયે 30 ઓક્ટોબર, 2026ના રોજ આ નવી સુવિધાની જાણકારી આપી હતી. આ સુવિધાનો હેતુ વિદેશ પ્રવાસ દરમિયાન ભારતીય પ્રવાસીઓ માટે ટિકિટ બુકિંગ અને ચુકવણીની પ્રક્રિયા સરળ બનાવવાનો છે.

કઈ જગ્યાઓ પર UPIથી ચુકવણી કરી શકાશે?

આ નવી સુવિધા હેઠળ હાલમાં દુબઈ અને સિંગાપોરનાં મુખ્ય પ્રવાસન સ્થળો પર UPI દ્વારા ઓનલાઇન ચુકવણી કરી શકાશે. આ સ્થળોમાં દુબઈનું બુર્જ ખલીફા, સિંગાપોરનું યુનિવર્સલ સ્ટુડિયો, ઓશનેરિયમ અને એડવેન્ચર કોવ વોટરપાર્કનો સમાવેશ થાય છે. આમાંથી કોઈ પણ સ્થળની મુલાકાત વખતે ભારતીય પ્રવાસીઓ ચુકવણી માટે UPIનો ઉપયોગ કરી શકશે.

બુર્જ ખલીફાની ટિકિટ કેવી રીતે બુક કરવી?

જો તમે દુબઈ ફરવા જઈ રહ્યા છો, તો આ સરળ પગલાં અનુસરીને બુર્જ ખલીફાની ટિકિટ બુક કરી શકો છો.

1. સૌથી પહેલાં બુર્જ ખલીફાની સત્તાવાર વેબસાઇટ પર જાઓ.

2. અહીં તમારી પસંદગી મુજબ સિલ્વર, ગોલ્ડ અથવા પ્લેટિનમ ટિકિટ પેકેજ પસંદ કરો.

3. ત્યારબાદ ‘બુક નાઉ’ પર ક્લિક કરો. અહીં મુલાકાતની તારીખ અને સમય પસંદ કરવાનો વિકલ્પ મળશે.

4. જરૂરી માહિતી ભરીને ‘એડ ટુ કાર્ટ’ પર ક્લિક કરો.

5. ત્યારબાદ ચેકઆઉટ વખતે પેમેન્ટના વિકલ્પોમાંથી UPI પસંદ કરીને ચુકવણી કરો.

ભારતીય પ્રવાસીઓને શું ફાયદો થશે?

આ નવી સુવિધાથી વિદેશ પ્રવાસે જતા ભારતીયોને ઘણી સરળતા મળશે. હવે ટિકિટ ખરીદવા માટે દરેક વખતે આંતરરાષ્ટ્રીય ડેબિટ કે ક્રેડિટ કાર્ડની જરૂર નહીં પડે. પ્રવાસીઓ પોતાની સામાન્ય UPI એપ દ્વારા જ ચુકવણી કરી શકશે. તેનાથી ટિકિટ બુકિંગની પ્રક્રિયા સરળ બનશે અને વિદેશી પ્રવાસન સ્થળો પર ભારતીય ડિજિટલ પેમેન્ટનો ઉપયોગ પણ વધશે.