PM નરેન્દ્ર મોદીએ ગુરુવારે સ્વાતંત્ર્ય સેનાની સુભાષચંદ્ર બોઝની પ્રશંસા કરતા કહ્યું કે તેમણે 1920માં સંસ્કૃતમાં સિવિલ સર્વિસની પરીક્ષા આપી હતી, જ્યારે દેશમાં અંગ્રેજોનું શાસન હતું. દિલ્હીના ભારત મંડપમ પરિસરમાં આયોજિત સંઘ લોક સેવા આયોગ (UPSC)ના શતાબ્દી સમારોહમાં સંબોધન દરમિયાન મોદીએ કહ્યું કે આ કાર્યક્રમ લાખો યુવાનોની આકાંક્ષાઓની ઉજવણી છે.
UPSC પર લોકોનો વિશ્વાસ આજે પણ અડગ
તેમણે કહ્યું કે આ દરેક ભારતીયના UPSC પર રહેલા વિશ્વાસની ઉજવણી છે. એક સદીની આ સફર દરમિયાન પેઢીઓ બદલાઈ, સરકારો બદલાઈ, ટેક્નોલોજી બદલાઈ અને અભ્યાસક્રમો બદલાયા, પરંતુ UPSC પરનો વિશ્વાસ આજે પણ એટલો જ અડગ છે. આ જ તેની સૌથી મોટી તાકાત છે. મોદીએ તમામ લોકોને કાર્યક્રમ સ્થળે બનાવવામાં આવેલી ગેલેરી જોવાનો પણ આગ્રહ કર્યો.
સુભાષચંદ્ર બોઝે સંસ્કૃતમાં આપી હતી પરીક્ષા
તેમણે કહ્યું, “ગેલેરી જોતી વખતે મને 1920ના એ સમયગાળાની માહિતી મળી, જ્યારે સુભાષચંદ્ર બોઝ પણ આ જ પરીક્ષામાંથી પસાર થયા હતા. મને એ જાણીને આશ્ચર્ય થયું કે તે સમયે અંગ્રેજોનું શાસન હોવા છતાં સંસ્કૃતનું એક પ્રશ્નપત્ર પણ હતું અને સુભાષ બાબુએ પોતાની પરીક્ષા સંસ્કૃતમાં આપી હતી.”
UPSCની શરૂઆત અને બદલાતી ભૂમિકા
PM મોદીએ અંગ્રેજોના શાસન દરમિયાન સંસ્થાની શરૂઆત અને આઝાદી પછી તેના વિકાસની સરખામણી કરતા કહ્યું કે આ વ્યવસ્થાએ એક આઝાદ દેશના સપનાઓને પૂર્ણ કરવાની દિશામાં સફળતાપૂર્વક પોતાનું ધ્યાન કેન્દ્રિત કર્યું. વડાપ્રધાને કહ્યું કે UPSCએ પોતાની ઐતિહાસિક જવાબદારીઓ નિભાવી છે, પરંતુ હવે આગામી 25 વર્ષ પર ધ્યાન કેન્દ્રિત કરવું જોઈ
સરદાર પટેલે UPSCને મજબૂત બનાવ્યું
PM મોદીએ સરદાર પટેલની પ્રશંસા કરતા કહ્યું કે તેમણે આ સંસ્થામાં પરિવર્તન લાવી તેને વધુ મજબૂત બનાવી અને આઝાદ ભારતનો એક મહત્વપૂર્ણ સ્તંભ બનાવ્યો. વડાપ્રધાને કહ્યું, “દેશના પુનર્નિર્માણ માટે જે મજબૂત માળખાની જરૂર હતી, તે સરદાર વલ્લભભાઈ પટેલે જ આપ્યું હતું.”