ઉત્તર પ્રદેશના મુખ્યમંત્રી યોગી આદિત્યનાથે વિશ્વ હિન્દુ પરિષદ (VHP) ના દિવંગત નેતા અશોક સિંઘલના જન્મ શતાબ્દી નિમિત્તે લખનૌમાં આયોજિત એક કાર્યક્રમમાં વિપક્ષ પર તીખા પ્રહારો કર્યા હતા. તેમણે બજરંગ દળના સભ્યોને રામ મંદિર ચળવળને બદનામ કરવાનો પ્રયાસ કરી રહેલા લોકોથી સતર્ક રહેવા આહ્વાન કર્યું હતું. સીએમ યોગીએ રામ કાજમાં વિઘ્ન નાખનારા આ તત્વોની તુલના રામાયણના ‘કલાનેમી’ નામના રાક્ષસ સાથે કરી હતી, જેણે ભગવાન હનુમાનજીને છેતરવાનો પ્રયાસ કર્યો હતો.
લખનૌમાં VHP ના કાર્યક્રમમાં હુંકાર
પોતાના સંબોધનમાં મુખ્યમંત્રીએ ગૌમાતાના મુદ્દે વિપક્ષી નેતાઓ પર નિશાન સાધતા કહ્યું કે, કેટલાક નકલખોરો ગાયને ‘રાષ્ટ્રીય પ્રાણી’ જાહેર કરવાના મેમોરેન્ડમ આપી રહ્યા છે. તેમણે સ્પષ્ટ કર્યું કે, “ગાય આપણી માતા છે અને અમારો તેની સાથે શાશ્વત સંબંધ છે. જેઓ ગાયને પ્રાણી ગણાવે છે તેઓ પોતે પશુ બુદ્ધિથી પીડાય છે.” તેમણે લોકોને માત્ર વાતો કરવાને બદલે વ્યક્તિગત રીતે પણ ગૌપાલનમાં ભાગ લેવા અપીલ કરી હતી.
ગાય રાષ્ટ્રીય પ્રાણી નહીં, આપણી માતા છે
કોંગ્રેસ પર પ્રહાર કરતા સીએમ યોગીએ યાદ અપાવ્યું કે ભૂતકાળમાં કોંગ્રેસે સુપ્રીમ કોર્ટમાં સોગંદનામું આપીને રામ અને કૃષ્ણના અસ્તિત્વને નકાર્યું હતું. તેમણે ઉમેર્યું કે 1990 માં જ્યારે તત્કાલીન સરકારે અયોધ્યામાં રામ ભક્તો પર ગોળીબાર કરાવ્યો હતો, ત્યારે અશોક સિંઘલનો અવાજ “સિંહની ગર્જના” બનીને ગૂંજ્યો હતો. 2017 માં ભાજપ સરકાર આવ્યા પછી અયોધ્યાનો રોનક બદલાઈ ગયો છે, જે રામના ગદ્દારો સહન કરી શકતા નથી.