વડોદરાના કરજણ નગરમાં નવરાત્રિ મહોત્સવના પ્રારંભ પૂર્વે સુરક્ષા અને સલામતી સુનિશ્ચિત કરવાના ભાગરૂપે કરજણ ફાયર એન્ડ ઈમરજન્સી વિભાગ દ્વારા એક વિશેષ મોકડ્રિલનું આયોજન કરવામાં આવ્યું હતું. કરજણ નગરમાં આયોજિત 2 મુખ્ય મેદાની ગરબા સ્થળ પર આગ લાગ્યા અંગેનો બનાવટી (ઇમરજન્સી) કોલ ફાયર બ્રિગેડને આપવામાં આવ્યો હતો. કોલ મળતાં જ કરજણ ફાયર ફાઈટરોની ટીમ તાત્કાલિક સાયરેન વગાડતી ગરબા મેદાન ખાતે પહોંચી ગઈ હતી, જેનાથી ક્ષણભર માટે ઉપસ્થિત લોકોમાં અફરાતફરી સર્જાઈ હતી. 

આગની ઘટના સમયે જાગૃતિ ફેલાવવાનો હેતુ

આ મોકડ્રિલનો મુખ્ય ઉદ્દેશ્ય નવરાત્રિ દરમિયાન હજારો ખેલૈયાઓ અને દર્શકોની ઉપસ્થિતિ વચ્ચે જો શોર્ટ સર્કિટ કે અન્ય કોઈ કારણોસર આકસ્મિક આગ લાગવાની ઘટના બને, તો ફાયર વિભાગનો રેસ્પોન્સ ટાઈમ (જવાબ આપવાનો સમય) કેટલો રહે છે તેની ચકાસણી કરવાનો હતો. આ સાથે જ આયોજકો, સુરક્ષા કર્મચારીઓ અને સ્થાનિક નાગરિકો કટોકટીના સમયે ગભરાયા વગર સલામત રીતે બહાર કેવી રીતે નીકળી શકે તથા પ્રાથમિક ફાયર સેફ્ટી સાધનોનો ઉપયોગ કેવી રીતે કરવો તે અંગે વિશેષ જાગૃતિ (Awareness) લાવવાનો હતો.

આયોજકોને ખાસ માર્ગદર્શન અપાયું 

ફાયર વિભાગના ઉચ્ચ અધિકારીઓ અને જવાનો દ્વારા ગરબા મેદાનના એન્ટ્રી-એક્ઝિટ પોઈન્ટ, ઈમરજન્સી ગેટ અને ફાયર સેફ્ટી સુવિધાઓની ઝીણવટભરી ચકાસણી કરવામાં આવી હતી. સફળ મોકડ્રિલ બાદ કરજણ ફાયર વિભાગ દ્વારા ગરબા આયોજકોને પંડાલમાં પૂરતા પ્રમાણમાં રેતીની બાલ્ટીઓ, ફાયર એક્સટિંગ્યુઇશર (આગ બુઝાવવાના યંત્રો) રાખવા અને ઈમરજન્સી વાહનો સરળતાથી આવી શકે તે માટે રસ્તો ખુલ્લો રાખવાની કડક માર્ગદર્શિકા આપાઈ હતી. 

ગુજરાતના વધુ સમાચાર વાંચવા માટે ક્લિક કરો