વડોદરા જિલ્લાના ડભોઈ તાલુકામાં સ્ટેટ મોનિટરિંગ સેલ (SMC) ની ટીમે મોટી કાર્યવાહી કરીને વિદેશી દારૂના કાળો કારોબાર પર પ્રહાર કર્યો છે. બાતમીના આધારે SMC ની ટીમે સરપ્રાઇઝ દરોડો પાડીને ભારતીય બનાવટના વિદેશી દારૂની મોટી સંખ્યામાં પેટીઓ ઝડપી પાડી છે. SMC ની આ સપાટાબંધ કાર્યવાહીથી સ્થાનિક બુટલેગરો અને અસામાજિક તત્વોમાં ભારે ફફડાટ વ્યાપી ગયો છે.
દારૂ અને વાહન સહિત રૂ. 28.65 લાખનો મુદ્દામાલ જપ્ત
દરોડા દરમિયાન પોલીસે ઘટનાસ્થળેથી મોટી માત્રામાં વિદેશી દારૂની બોટલો, હેરાફેરી માટે ઉપયોગમાં લેવાયેલું વાહન તેમજ અન્ય સામાન મળીને કુલ રૂ. 28.65 લાખનો મુદ્દામાલ કબ્જે કર્યો છે. ગેરકાયદેસર દારૂનો આટલો મોટો જથ્થો ક્યાંથી લાવવામાં આવ્યો હતો અને કોને સપ્લાય કરવાનો હતો તે દિશામાં પોલીસે તપાસના ચક્રો ગતિમાન કર્યા છે.
ડભોઈ પોલીસ મથકે ગુનો નોંધાયો, 6 આરોપીઓ સામે કાર્યવાહી
આ મામલે ડભોઈ પોલીસ સ્ટેશન ખાતે કાયદેસરની ફરિયાદ નોંધવામાં આવી છે અને કુલ 6 આરોપીઓ સામે ગુનો નોંધી કાર્યવાહી હાથ ધરવામાં આવી છે. SMC ની આ સફળ કામગીરી બાદ સ્થાનિક પોલીસની કામગીરી સામે પણ સવાલો ઊભા થયા છે, જ્યારે પોલીસે ફરાર અને સંડોવાયેલા અન્ય આરોપીઓને ઝડપી પાડવા માટે વધુ તપાસ હાથ ધરી છે.