વડોદરા શહેર નજીક આવેલા ડભોઈ રોડ પર એક ગમખ્વાર માર્ગ અકસ્માતની ઘટના સામે આવી છે. રતનપુર ગામ પાસે પૂરપાટ ઝડપે આવી રહેલા એક ‘છોટા હાથી’ વાહનના ચાલકે ગફલતભરી રીતે વાહન હંકારીને અકસ્માત સર્જ્યો હતો. આ વાહને સામેથી આવી રહેલા એક મોપેડ ચાલકને જોરદાર અડફેટે લેતાં ધડાકાભેર ટક્કર વાગી હતી. અકસ્માત એટલો ભયાનક હતો કે મોપેડનો કૂચડો વળી ગયો હતો અને માર્ગ પરથી પસાર થતાં વાહનચાલકોમાં ભારે અરેરાટી વ્યાપી ગઈ હતી.
કલ્પેશ પરમારનું ઘટનાસ્થળે જ નીપજ્યું મોત
આ ગંભીર માર્ગ દુર્ઘટનામાં મોપેડ પર સવાર કલ્પેશ પરમાર નામના યુવકને શરીરે તથા માથાના ભાગે જીવલેણ ઈજાઓ પહોંચી હતી. અકસ્માત સર્જાયા બાદ આસપાસના લોકો મદદ માટે તાત્કાલિક સ્થળ પર દોડી આવ્યા હતા, પરંતુ ગંભીર ઈજાઓના કારણે કલ્પેશ પરમારે ઘટનાસ્થળે જ દમ તોડી દીધો હતો. ઘટનાની જાણ થતાં જ મૃતકના પરિવારજનોમાં આક્રંદ છવાઈ ગયો હતો. અકસ્માત સર્જીને વાહનચાલક સ્થળ પરથી ફરાર થઈ ગયો હોવાની માહિતી મળી છે.
પોલીસે ગુનો નોંધી આગળની તપાસ હાથ ધરી
અકસ્માતના બનાવ અંગે સ્થાનિકો દ્વારા જાણ કરવામાં આવતાં જ વરણામા પોલીસ મથકની ટીમ તાત્કાલિક ઘટનાસ્થળે પહોંચી ગઈ હતી. પોલીસે મૃતક કલ્પેશ પરમારના મૃતદેહનો કબજો મેળવીને કાયદેસરની કાર્યવાહી હાથ ધરી હતી અને મૃતદેહને પોસ્ટમોર્ટમ અર્થે હોસ્પિટલ મોકલી આપ્યો હતો. વરણામા પોલીસે અકસ્માતનો ગુનો નોંધીને ફરેલા ‘છોટા હાથી’ વાહનના ચાલકની શોધખોળ શરૂ કરી છે અને અકસ્માતના આ મામલે વધુ તપાસ હાથ ધરી છે.