વડોદરા શહેરના માણેજા ક્રોસિંગથી જામ્બુવા તરફ જતાં મુખ્ય માર્ગ પર એક અત્યંત કરૂણ અને ગમખ્વાર અકસ્માતની ઘટના સામે આવી છે. મુખ્ય રોડ પરથી પસાર થઈ રહેલી એક મહિલા અને નાની બાળકીને પૂરઝડપે આવી રહેલા બાઇક ચાલકે જોરદાર અડફેટે લીધા હતા. બાઇકની ટક્કર એટલી સખત હતી કે મહિલા અને બાળકી બંને રોડ પર પટકાતાં તેમને શરીરે ગંભીર ઈજાઓ પહોંચી હતી.

એસએસજી હોસ્પિટલમાં બાળકીને મૃત જાહેર કરાઈ 

અકસ્માત બાદ સ્થાનિકો એકઠા થઈ ગયા હતા અને ગંભીર રીતે ઈજાગ્રસ્ત થયેલી બાળકીને તાત્કાલિક ધોરણે વધુ સારવાર અર્થે વડોદરાની એસએસજી (SSG) હોસ્પિટલ ખાતે ખસેડવામાં આવી હતી. જોકે, હોસ્પિટલમાં ફરજ પરના તબીબોએ પ્રાથમિક તપાસ બાદ બાળકીને મૃત જાહેર કરી હતી. કાળજું કંપાવી દેનારી આ ઘટનાને પગલે બાળકીના પરિવારજનોમાં ભારે અરેરાટી અને શોકનું મોજું ફરી વળ્યું છે, જ્યારે ઈજાગ્રસ્ત મહિલા સારવાર હેઠળ છે.

સમગ્ર અકસ્માત CCTV માં કેદ, પોલીસે તપાસ હાથ ધરી 

બાઇક અને રાહદારીઓ વચ્ચે સર્જાયેલા આ હૃદયદ્રાવક અકસ્માતની સમગ્ર ઘટના નજીકમાં લાગેલા સીસીટીવી (CCTV) કેમેરામાં કેદ થઈ ગઈ છે. અકસ્માત અંગેની જાણ થતાં જ સ્થાનિક પોલીસનો કાફલો ઘટનાસ્થળે અને હોસ્પિટલ પહોંચી ગયો હતો. પોલીસે સીસીટીવી ફૂટેજ કબ્જે કરીને બેદરકારીપૂર્વક બાઇક ચલાવનાર ચાલક વિરુદ્ધ ગુનો નોંધી આગળની કાનૂની કાર્યવાહી હાથ ધરી છે.

ગુજરાતના વધુ સમાચાર વાંચવા માટે ક્લિક કરો