દિવાળીના પવિત્ર તહેવાર અને ઉત્સવના માહોલ વચ્ચે ગુજરાતના બે મોટા શહેરોમાંથી એક મોટા ડરામણા સમાચાર સામે આવ્યા છે. વડોદરા અને સુરત એમ બંને શહેરોમાં આવેલી ‘બેંક ઓફ બરોડા’ની વિવિધ શાખાઓને બોમ્બથી ઉડાવી દેવાની ગંભીર ધમકીભર્યો ઇમેઇલ મળતા સુરક્ષા એજન્સીઓમાં ભારે દોડધામ મચી ગઈ છે.

વડોદરામાં રાવપુરા, કોઠી અને ટાવર બ્રાન્ચ નિશાને

વડોદરા શહેરમાં બેંક ઓફ બરોડાની મુખ્ય અને વ્યસ્ત ગણાતી શાખાઓ જેવી કે રાવપુરા બ્રાન્ચ, કોઠી બ્રાન્ચ અને ટાવર ચાર રસ્તા પાસે આવેલી બ્રાન્ચને ઈમેલ દ્વારા ઉડાવી દેવાની ધમકી આપવામાં આવી હતી. મેલ મળતાની સાથે જ બેંકના અધિકારીઓ અને સ્ટાફમાં ગભરાટ ફેલાઈ ગયો હતો અને તુરંત જ તમામ કર્મચારીઓ તેમજ ગ્રાહકોને બેંકની બહાર સુરક્ષિત જગ્યાએ ખસેડવામાં આવ્યા હતા. માહિતી મળતાની સાથે જ ક્રાઇમ બ્રાન્ચ અને સ્થાનિક પોલીસની ટીમો તાત્કાલિક સ્થળ પર પહોંચી ગઈ હતી.

સુરતના ઘોડદોડ રોડ બ્રાન્ચમાં પણ બોમ્બનો ઇમેઇલ મળ્યો

વડોદરા ઉપરાંત સુરત શહેરમાં પણ સુરતના સૌથી પોશ અને વ્યસ્ત ઘોડદોડ રોડ વિસ્તારમાં આવેલી બેંક ઓફ બરોડાની બ્રાન્ચ પર આ પ્રકારનો ધમકીભર્યો મેલ આવ્યો હતો. મેલ મળવાની જાણ થતાં જ સુરત પોલીસ, બોમ્બ ડિસ્પોઝલ સ્કવોડ, સ્નિફર ડોગ સ્કવોડ અને ફાયર વિભાગની ટીમો તાત્કાલિક ઘટના સ્થળે દોડી આવી હતી. પોલીસે ત્વરિત કાર્યવાહી કરીને બેંક ખાલી કરાવીને સઘન તપાસ શરૂ કરી દીધી હતી.

પોલીસ દ્વારા સઘન તપાસ અને સાયબર ટીમ કામે લાગી

તહેવારના સમયે બેંકોને ટાર્ગેટ કરીને મોકલવામાં આવેલા આ ધમકીભર્યા મેલને પગલે પોલીસ તંત્ર હરકતમાં આવી ગયું છે. વડોદરા અને સુરત ક્રાઇમ બ્રાન્ચે સંયુક્ત રીતે અથવા અલગ-અલગ સઘન તપાસ શરૂ કરી છે. આ મેલ ક્યાંથી અને કોણે મોકલ્યો છે તે અંગે સાયબર ક્રાઇમ ટીમ ઇમેઇલ આઈડી ટ્રેસ કરવાની કામગીરી કરી રહી છે. સુરક્ષાના ભાગરૂપે બેંકોની આસપાસ પોલીસનો ચુસ્ત બંદોબસ્ત ગોઠવી દેવામાં આવ્યો છે.

આ પણ વાંચો: Explainer: દિવાળી અને બેસતા વર્ષ વચ્ચે કેમ આવે છે ‘ધોકો’?