વડોદરા જિલ્લાના વાઘોડિયા તાલુકામાંથી પસાર થતાં વ્યસ્ત વડોદરા-હાલોલ સ્ટેટ હાઈવે પર એક અત્યંત કરૂણ અને ગમખ્વાર માર્ગ અકસ્માત સર્જાયો છે. વાઘોડિયાના જરોદ પોલીસ સ્ટેશનની હદ વિસ્તારમાં આગળ જઈ રહેલા એક અજાણ્યા વાહનની પાછળના ભાગે પૂરપાટ ઝડપે જઈ રહેલી બાઈક ધડાકાભેર ઘૂસી ગઈ હતી. અકસ્માત એટલો ભયાનક હતો કે બાઈકના કૂચેકૂચા નીકળી ગયા હતા.
બાઈક ચાલકનું નીપજ્યું મોત, વાહન ચાલક અકસ્માત સર્જી ફરાર
આ ભયાનક ટક્કરમાં બાઈક ચાલકને શરીરે તથા મોંના ભાગે ગંભીર ઈજાઓ પહોંચવાના કારણે તેનું ઘટનાસ્થળે જ કમકમાટીભર્યું મોત નીપજ્યું હતું. અકસ્માત સર્જાયા બાદ અજાણ્યો વાહન ચાલક પોતાનું વાહન લઈને સ્થળ પરથી ફરાર થઈ ગયો હતો. ઘટનાને પગલે હાઈવે પરથી પસાર થતાં અન્ય વાહનચાલકોના ટોળાં એકઠા થઈ ગયા હતા અને સ્થાનિક જરોદ પોલીસને જાણ કરવામાં આવી હતી.
જરોદ પોલીસે ગુનો નોંધી ફરાર વાહન ચાલકની શોધખોળ હાથ ધરી
અકસ્માત અંગેની જાણ થતાં જ જરોદ પોલીસ મથકની ટીમ તુરંત ઘટનાસ્થળે દોડી આવી હતી. પોલીસે મૃતક બાઈક ચાલકના મૃતદેહનો કબજો મેળવી પંચનામું કરી પોસ્ટમોર્ટમ અર્થે હોસ્પિટલ ખસેડ્યો હતો. જરોદ પોલીસે અકસ્માત સર્જી ફરાર થઈ ગયેલા અજાણ્યા વાહન ચાલક વિરૂદ્ધ ગુનો નોંધીને હાઈવે પરના સીસીટીવી ફુટેજ મેળવી તેની શોધખોળ સહિત આગળની વધુ તપાસ હાથ ધરી છે.