વડોદરાની નામદાર કોર્ટ પરિસરમાંથી એક ચોંકાવનારી ઘટના સામે આવી છે. કોર્ટ સંકુલમાં ફરજ પર અથવા કામ અર્થે આવેલા પોલીસ કર્મચારી પર એક શખ્સે અચાનક જીવલેણ હુમલો કરી દીધો હતો. દિનદહાડે કોર્ટ જેવા સુરક્ષિત ગણાતા વિસ્તારમાં પોલીસ પર જ હુમલો થતાં જ સમગ્ર પરિસરમાં ભારે અફરાતફરી અને ચકચાર મચી ગઈ હતી.

આરોપી કેનેડાની નાગરિકતા ધરાવતો હોવાનો ખુલાસો

પ્રાથમિક તપાસમાં મળતી માહિતી મુજબ, હુમલો કરનાર આરોપીની ઓળખ ગૌરાંગ ગિરીશ પટેલ તરીકે થઈ છે. આરોપી મૂળ કુંવરપુરા ગામનો રહેવાસી છે અને હાલ તેની પાસે કેનેડાની નાગરિકતા છે. હુમલાનો ભોગ બનેલા ઈજાગ્રસ્ત પોલીસ કર્મચારી માંજલપુર પોલીસ સ્ટેશનના હોવાનું જાણવા મળ્યું છે.

હુમલા પાછળનું કારણ અકબંધ

કોર્ટ પરિસરમાં બનેલી આ ઘટના બાદ તરત જ અકોટા પોલીસ એક્શનમાં આવી હતી અને આરોપી ગૌરાંગ પટેલને સ્થળ પરથી જ તાત્કાલિક ઝડપી લીધો હતો. આ હુમલો કયા કારણોસર કરવામાં આવ્યો અને તેની પાછળ શું વિવાદ હતો તે અંગેનું ચોક્કસ કારણ હજુ સુધી અકબંધ છે. અકોટા પોલીસે આરોપી સામે ગુનો નોંધીને હુમલા પાછળનું સાચું કારણ જાણવા માટે ઊંડાણપૂર્વક તપાસ હાથ ધરી છે.

આ પણ વાંચો: Vadodara ક્રાઇમ બ્રાન્ચે 13 બાઇક ચોરીનો ભેદ ઉકેલ્યો, ભરૂચના સિક્યુરિટી ગાર્ડની કરી ધરપકડ