વલસાડ જિલ્લાના ધરમપુર તાલુકામાં આવેલા ગુંદિયા ગામે એક અવાવરૂ કૂવામાં દીપડો ખાબકવાની ચોંકાવનારી ઘટના સામે આવી છે. ગુંદિયા ગામના સીમ વિસ્તારમાં આવેલા કૂવામાંથી પ્રાણીનો અવાજ આવતાં જ સ્થાનિક લોકો એકઠા થઈ ગયા હતા અને તપાસ કરતાં કૂવામાં દીપડો હોવાનું માલૂમ પડ્યું હતું. કૂવામાં દીપડો પડ્યો હોવાની વાત વાયુવેગે પ્રસરતાં જ ઘટનાસ્થળે મોટી સંખ્યામાં ગ્રામજનો અને આસપાસના લોકોના ટોળેટોળાં ઉમટી પડ્યા હતા. સ્થાનિકોએ ત્વરિત બુદ્ધિ વાપરીને આ અંગેની જાણ ધરમપુર વન વિભાગની ટીમને કરી હતી.

વન વિભાગ અને ગ્રામજનોના સંયુક્ત ઓપરેશનથી દીપડાનું મહામુસીબતે રેસ્ક્યૂ

ઘટના અંગે માહિતી મળતાં જ વન વિભાગનો કાફલો જરૂરી રેસ્ક્યૂ સાધનો અને પાંજરા સાથે તુરંત ગુંદિયા ગામે દોડી આવ્યો હતો. કૂવો ઊંડો હોવાથી રેસ્ક્યૂ કામગીરી અત્યંત જોખમી અને પડકારજનક બની રહી હતી. વન વિભાગની ટીમે સ્થાનિક ગ્રામજનોના સહયોગથી ભારે જહેમત ઉઠાવીને કૂવામાં પાંજરૂં ઉતાર્યું હતું. કલાકોની ભારે મુસીબત અને ચીવટપૂર્વકના પ્રયાસો બાદ આખરે દીપડાને સલામત રીતે કૂવામાંથી બહાર કાઢીને પાંજરે પૂરવામાં સફળતા મળી હતી, જેનાથી વન વિભાગ અને ગ્રામજનોએ રાહતનો શ્વાસ લીધો હતો.

વલસાડ અને ધરમપુરમાં દીપડાની સંખ્યા વધતાં સ્થાનિકોમાં ચિંતા ઘેરી બની

સદનસીબે આ સમગ્ર રેસ્ક્યૂ કામગીરી દરમિયાન દીપડો કે કોઈ ગ્રામજન ઈજાગ્રસ્ત થયા નથી. પાંજરે પુરાયેલા દીપડાનું તબીબી પરીક્ષણ કરીને તેને સુરક્ષિત ઊંડા વન વિસ્તારમાં મુક્ત કરવાની તજવીજ હાથ ધરવામાં આવી છે. જોકે, છેલ્લા કેટલાક સમયથી વલસાડ અને ધરમપુર તાલુકાના ગ્રામ્ય વિસ્તારોમાં દીપડાઓની વસતી અને માનવ વસાહતો નજીક ચહલપહલ ઉત્તરોત્તર વધતાં સ્થાનિક રહીશો તથા ખેડૂતોમાં ભારે ચિંતા અને ભયનું વાતાવરણ વ્યાપી ગયું છે. ગ્રામજનોએ વન વિભાગ સમક્ષ સીમ વિસ્તારોમાં નિયમિત પાંજરા મૂકીને સુરક્ષા સુનિશ્ચિત કરવાની માંગ કરી છે.

આ પણ વાંચો : Weather Update : રાજ્યમાં વરસાદ અંગે મહત્વના સમાચાર, ભારે વરસાદનું જોર ઘટ્યું, વાતાવરણમાં માત્ર ઝાપટાં પડવાની શક્યતા