વલસાડ જિલ્લામાં લાંબા સમયના વિરામ બાદ આખરે હવામાનમાં અચાનક મોટો પલટો આવ્યો છે અને મેઘરાજાએ ધમાકેદાર પુનઃઆગમન કર્યું છે. જિલ્લાના મોટાભાગના વિસ્તારોમાં કાળાડીબાંગ વાદળોના ઘેરાવા વચ્ચે ભારે ગાજવીજ અને કડકા-ભડકા સાથે ધોધમાર વરસાદ તૂટી પડ્યો હતો. લાંબા સમયથી વરસાદની આતુરતાપૂર્વક રાહ જોઈ રહેલા સ્થાનિક નાગરિકો અને પંથકના ખેડૂતો માટે આ વરસાદ સંજીવનીરૂપ સાબિત થયો છે.

ખેડૂતોમાં ખુશીની લહેર અને વાતાવરણમાં પ્રસરી ઠંડક

અચાનક શરૂ થયેલા આ ધોધમાર વરસાદથી વલસાડ જિલ્લામાં છેલ્લા કેટલાક દિવસોથી વર્તાઈ રહેલા અસહ્ય બફારા અને ગરમીમાંથી લોકોને મોટી રાહત મળી છે. સમગ્ર વિસ્તારમાં ક્ષણવારમાં જ આહલાદક ઠંડક પ્રસરી ગઈ હતી. આ સિવાય વાવણી અને ઊભા પાક માટે અત્યંત જરૂરી એવા વરસાદનું આગમન થતાં જ જિલ્લાના ખેડૂતોમાં આનંદ અને ઉત્સાહનો માહોલ જોવા મળી રહ્યો છે.

હાઈવે પર 0 વિઝિબિલિટીથી વાહનચાલકો મુશ્કેલીમાં મુકાયા

જોકે, બીજી તરફ ભારે ગાજવીજ અને મૂસળધાર વરસાદના કારણે નેશનલ તથા સ્ટેટ હાઈવે પર દ્રશ્યતા (વિઝિબિલિટી) ઘટીને શૂન્ય થઈ ગઈ હતી. મુસળધાર પાણી વરસવાને કારણે વાહનચાલકોને સામેથી આવતાં વાહનો જોવામાં ભારે તકલીફ પડી હતી. હાઈવે પર ઝીરો વિઝિબિલિટીના લીધે વાહનોની ગતિ એકાએક ધીમી પડી ગઈ હતી, જેના પરિણામે વાહનચાલકો અને મુસાફરોને ભારે હાલાકીનો સામનો કરવો પડ્યો હતો.

આ પણ વાંચો : Valsad News : ઉમરસાડી નજીક ધાર્મિક પ્રસંગે કરુણાંતિકા, માછલીના દોરામાં ફસાયા બાદ બોટ પથ્થર સાથે ટકરાતાં નદીમાં ખાબકી!