ગીર સોમનાથ જિલ્લાના વેરાવળ શહેરમાં નવરાત્રિ મહોત્સવ શાંતિપૂર્ણ અને સુરક્ષિત વાતાવરણમાં સંપન્ન થાય તે માટે વેરાવળ સીટી પોલીસ સ્ટેશન ખાતે એક ખાસ શાંતિ સમિતિની બેઠક યોજાઈ હતી. પી.આઈ. (PI) જે.એન. ગઢવીની અધ્યક્ષતામાં યોજાયેલી આ બેઠકમાં શહેરના તમામ નાના-મોટા ગરબી આયોજકો ઉપસ્થિત રહ્યા હતા. પોલીસે તમામ આયોજકોને ગરબી સ્થળો પર સીસીટીવી (CCTV) કેમેરા તૈનાત કરવા, પૂરતી લાઈટિંગ વ્યવસ્થા રાખવા અને ગરબા જોવા આવતા ખેલૈયાઓ તથા દર્શકો માટે વ્યવસ્થિત પાર્કિંગની જગ્યા ફાળવવાની કડક સૂચના આપી હતી.

દીકરીઓની સુરક્ષા માટે એન્ટી રોમિયો સ્ક્વોડ તૈનાત

મહિલાઓ અને દીકરીઓની સુરક્ષા માટે વેરાવળ પોલીસ દ્વારા વિશેષ આયોજન કરવામાં આવ્યું છે. ગરબી મંડળો પર સાદા વેશમાં મહિલા પોલીસ કર્મચારીઓ, સી-ટીમ (She Team) અને એન્ટી રોમિયો સ્ક્વોડ તૈનાત રહેશે. આ ઉપરાંત, અવાવરૂ વિસ્તારોમાં પોલીસ પેટ્રોલિંગ વધારી દેવાયું છે. નવરાત્રિમાં નશાની હાલતમાં રખડતા તત્વો સામે બ્રેથ એનાલાઈઝર (Breath Analyzer) વડે સરપ્રાઈઝ ચેકિંગ હાથ ધરીને આકરી કાનૂની કાર્યવાહી કરવામાં આવશે.

સાયબર ફ્રોડથી બચવા 112 ડાયલ કરવા અપીલ

પોલીસ તંત્ર દ્વારા નગરજનોને નવરાત્રિ દરમિયાન ઘર બંધ કરીને ગરબે રમવા જતી વખતે કિંમતી દાગીના તથા રોકડ રકમની સુરક્ષા પ્રત્યે તકેદારી રાખવા ખાસ અનુરોધ કરાયો છે. આ ઉપરાંત, ચણિયાચોળી અને ઓનલાઈન ગરબા પાસ કે ખરીદીના નામે થતી સાયબર ઠગાઈ (Cyber Fraud) થી સાવધ રહેવા ચેતવણી આપવામાં આવી છે. કોઈપણ અટોકટી કે કટોકટીના સમયે તાત્કાલિક પોલીસ સહાય મેળવવા માટે 112 નંબર પર સંપર્ક કરવા અપીલ કરાઈ છે.

ગુજરાતના વધુ સમાચાર વાંચવા માટે ક્લિક કરો