વિરાટ કોહલીને જ્યારે પૂછવામાં આવ્યું કે જો અલગ-અલગ ખેલાડીઓની ખાસ બેટિંગ સ્કિલ લઈને એક પરફેક્ટ ODI બેટર બનાવવો હોય તો તે કોને પસંદ કરશે, ત્યારે તેણે દરેક શોટ માટે અલગ ખેલાડીનું નામ આપ્યું. કોહલીએ સ્ટ્રેટ ડ્રાઈવ માટે સચિન તેંડુલકર, કવર ડ્રાઈવ માટે કુમાર સંગાકારા અને ફ્લિક માટે રાહુલ દ્રવિડને પસંદ કર્યા. આ ત્રણેય ખેલાડીઓની પોતાની અલગ બેટિંગ શૈલી રહી છે અને કોહલીએ તેમની ચોક્કસ શોટ-મેકિંગ ક્ષમતાને પસંદ કરી.
કટ અને સ્વીપ માટે પણ દિગ્ગજોની પસંદગી
કોહલીએ કટ શોટ માટે વીરેન્દ્ર સેહવાગનું નામ પસંદ કર્યું. સેહવાગ પોતાની આક્રમક બેટિંગ અને ખાસ કરીને ઓફસાઈડમાં ઝડપી રન બનાવવાની ક્ષમતા માટે જાણીતા રહ્યા છે. સ્વીપ શોટ માટે કોહલીએ મેથ્યુ હેડનને પસંદ કર્યા. ઓસ્ટ્રેલિયાના પૂર્વ ઓપનર હેડન સ્પિન બોલિંગ સામે આક્રમક બેટિંગ કરવા માટે જાણીતા હતા. આ રીતે કોહલીએ પોતાના આદર્શ બેટરની બેટિંગમાં ટેકનિક અને આક્રમકતા બંનેનો સમાવેશ કર્યો.
6 મારવા માટે ક્રિસ ગેઈલ, રનિંગ માટે AB ડી વિલિયર્સ
જ્યારે વાત મોટા સિક્સ મારવાની આવી ત્યારે કોહલીએ વેસ્ટ ઈન્ડિઝના દિગ્ગજ ક્રિસ ગેઈલને પસંદ કર્યા. ગેઈલ પોતાની પાવર હિટિંગ માટે દુનિયાભરમાં જાણીતા રહ્યા છે. લાંબી સિક્સ મારવાની તેમની ક્ષમતા T20 ક્રિકેટમાં પણ તેમની સૌથી મોટી ઓળખ રહી છે. બીજી તરફ, વિકેટ વચ્ચે ઝડપથી રન લેવા માટે કોહલીએ AB ડી વિલિયર્સને પસંદ કર્યા. દક્ષિણ આફ્રિકાના પૂર્વ બેટર મેદાનના લગભગ દરેક ભાગમાં શોટ રમવાની સાથે ઝડપી રનિંગ માટે પણ જાણીતા હતા.
રોહિત અને ધોની લિસ્ટમાં કેમ નહીં?
કોહલીની આ પસંદગીમાં ભારતીય ક્રિકેટના બે મોટા નામ રોહિત શર્મા અને MS ધોની જોવા મળ્યા નહીં. ખાસ વાત એ છે કે કોહલીએ આ પસંદગી દરેક ખેલાડીની ચોક્કસ બેટિંગ સ્કિલના આધારે કરી હતી. તેથી આ લિસ્ટને કોઈ ખેલાડીની સંપૂર્ણ કારકિર્દી કે શ્રેષ્ઠતા અંગેની રેન્કિંગ તરીકે જોવી યોગ્ય નથી. કોહલી અને ધોનીએ લાંબા સમય સુધી ભારતીય ટીમમાં સાથે ક્રિકેટ રમ્યા છે. કોહલીએ વાતચીત દરમિયાન ધોનીને પોતાના પ્રથમ કેપ્ટન તરીકે પણ ખાસ યાદ કર્યા.
વેસ્ટ ઈન્ડિઝ સામે 139 રનની ઇનિંગ બાદ ચર્ચામાં આવ્યા કોહલી
કોહલી હાલમાં વેસ્ટ ઈન્ડિઝ સામેની ODI સિરીઝને લઈને પણ ચર્ચામાં છે. 27 સપ્ટેમ્બરે તિરુવનંતપુરમમાં રમાયેલી પ્રથમ ODIમાં તેણે માત્ર 88 બોલમાં અણનમ 139 રન બનાવ્યા હતા. ભારતે 296 રનનો લક્ષ્યાંક 8 વિકેટે જીત મેળવીને હાંસલ કર્યો હતો. આ ઇનિંગ દરમિયાન કોહલીએ પોતાની 55મી ODI સદી ફટકારી અને ODI ક્રિકેટમાં 15,000 રન પણ પૂરા કર્યા. તે આ મુકામ સુધી પહોંચનાર સચિન તેંડુલકર બાદ માત્ર બીજો બેટર બન્યો અને 315 ઇનિંગ્સમાં આ આંકડો પાર કરીને સૌથી ઝડપી પણ બન્યો.
આ પણ વાંચો: IPL: મોહિત શર્માની CSKમાં ફરી એન્ટ્રી, CSKમાં બોલિંગ કોચ બનીને કરશે બીજી ઇનિંગની શરૂઆત