ભારતીય ટીમના પૂર્વ કેપ્ટન વિરાટ કોહલી રિયલ એસ્ટેટમાં પોતાનું રોકાણ વધારી રહ્યા છે. આમાં તેમની પત્ની અને બોલિવૂડ અભિનેત્રી અનુષ્કા શર્મા પણ સામેલ છે. તાજેતરમાં વિરાટ કોહલી, અનુષ્કા શર્મા અને અભિનેત્રીના પરિવારે મુંબઈના પોશ વર્સોવા વિસ્તારમાં 3 મોટી ડીલ કરી છે. અહીં એક રહેણાંક પ્રોજેક્ટમાં એક જ માળ પર 3 ફ્લેટ ખરીદવામાં આવ્યા છે. આ ડીલની કુલ કિંમત આશરે ₹44.1 કરોડ છે.

ગોદરેજ સ્કાયશોરમાં ખરીદ્યા ફ્લેટ

રિયલ એસ્ટેટ ડેટા એનાલિટિક્સ કંપની CRE મેટ્રિક્સ પાસેથી મળેલા પ્રોપર્ટી રજિસ્ટ્રેશન દસ્તાવેજો અનુસાર, વિરાટ, અનુષ્કા અને તેમના પરિવારે ખરીદેલા ત્રણેય ફ્લેટ મુંબઈના વર્સોવામાં યારી રોડ પર આવેલી ગોદરેજ સ્કાયશોર બિલ્ડિંગમાં છે.

અનુષ્કા શર્માનો ફ્લેટ કેટલો મોટો છે?

રિપોર્ટમાં પ્રોપર્ટીના દસ્તાવેજોમાં દર્શાવવામાં આવેલી વિગતોના આધારે જણાવાયું છે કે અભિનેત્રી અનુષ્કા શર્માએ આ બિલ્ડિંગમાં આશરે 2,153 ચોરસ ફૂટનો ફ્લેટ ખરીદ્યો છે. તેની કિંમત ₹14.89 કરોડ છે. આ માટે તેમણે ₹74.47 લાખ સ્ટેમ્પ ડ્યૂટી ચૂકવી છે. આ ફ્લેટ સાથે બેઝમેન્ટમાં 3 કવર પાર્કિંગ સ્પેસ પણ મળ્યાં છે.અનુષ્કા શર્માનાં માતા-પિતા આશિમા અને અજય કુમાર શર્માએ પણ અહીં ₹10.91 કરોડમાં એક ફ્લેટ ખરીદ્યો છે. આ ફ્લેટ સાથે બેઝમેન્ટમાં 2 કવર પાર્કિંગ સ્પેસ મળ્યાં છે. અભિનેત્રીનાં માતા-પિતાએ સ્ટેમ્પ ડ્યૂટી તરીકે ₹65.44 લાખ ચૂકવ્યા છે. CRE મેટ્રિક્સ અનુસાર,બંને ખરીદીનું રજિસ્ટ્રેશન 8 જુલાઈ, 2026ના રોજ થયું હતું. આ ફ્લેટ વન-સ્ટોપ બિઝનેસ સર્વિસિસ LLP પાસેથી ખરીદવામાં આવ્યા હતા, જેના ડેવલપર ગોદરેજ પ્રોપર્ટીઝ હતા.

વિરાટ કોહલી સાથે ત્રીજો ફ્લેટ ખરીદ્યો

‘બિઝનેસ ટુડે’માં પ્રકાશિત અહેવાલ અનુસાર, અનુષ્કા શર્માએ પોતાના પતિ અને ક્રિકેટર વિરાટ કોહલી સાથે મળીને ત્રીજો ફ્લેટ ખરીદ્યો છે. તેની કિંમત ₹18.29 કરોડ હોવાનું કહેવાય છે. ઝેપકી દ્વારા મેળવેલા પ્રોપર્ટી દસ્તાવેજો અનુસાર, 2,644 ચોરસ ફૂટના આ ફ્લેટનું રજિસ્ટ્રેશન 21 જુલાઈ, 2026ના રોજ થયું હતું. આ ફ્લેટ સાથે પણ 3 કાર પાર્કિંગની જગ્યા સામેલ છે.

24મા માળે આવેલા છે ત્રણેય ફ્લેટ

વિરાટ કોહલી, અનુષ્કા શર્મા અને તેમના પરિવારે ખરીદેલા ત્રણેય ફ્લેટ ગોદરેજ સ્કાયશોરના ટાવર-Aના 24મા માળે આવેલા છે. આ પ્રોજેક્ટનું બાંધકામ હજી ચાલુ છે. રજિસ્ટ્રેશનની વિગતો અનુસાર, અનુષ્કા અને તેમનાં માતા-પિતાના ફ્લેટનો કબજો 30 જૂન, 2031ના રોજ અથવા તે પહેલાં મળવાની અપેક્ષા છે.

વિરાટ-અનુષ્કાએ અહીં પણ કર્યું છે રોકાણ

મુંબઈમાં વિરાટ અને અનુષ્કાની આ પહેલી ખરીદી નથી. તેમણે અલીબાગમાં પણ પ્રોપર્ટીમાં રોકાણ કર્યું છે. અહેવાલો અનુસાર, આ સેલિબ્રિટી કપલે જાન્યુઆરી 2026માં ત્યાં એકબીજા સાથે જોડાયેલા 2 પ્લોટ ખરીદ્યા હતા. તેમની કિંમત ₹37.86 કરોડ હતી. 13 જાન્યુઆરીએ રજિસ્ટર થયેલા આ સોદા માટે આશરે ₹2.27 કરોડ સ્ટેમ્પ ડ્યૂટી ચૂકવવામાં આવી હતી.

આ પણ વાંચો – Tushar Deshpandeએ હેટ્રિક લઈને મચાવી ધૂમ, 7 ઓવરમાં લીધી 5 વિકેટ