18 સપ્ટેમ્બરથી ભારત અંડર-19 ક્રિકેટ ટીમ અને ઓસ્ટ્રેલિયા અંડર-19 ક્રિકેટ ટીમ વચ્ચે વન-ડે સિરીઝની શરૂઆત થઈ ગઈ છે. સિરીઝની પ્રથમ મેચ નિરંજન શાહ સ્ટેડિયમ, ખંડેરી, રાજકોટ ખાતે રમાઈ રહી છે. જ્યાં વરસાદ પડવાના કારણે આ વન-ડે મુકાબલો 20-20 ઓવરનો કરી દેવામાં આવ્યો છે. આ મેચમાં ઓસ્ટ્રેલિયાની ટીમે ટૉસ જીતીને પહેલાં બોલિંગ કરવાનો નિર્ણય કર્યો છે. ખાસ વાત એ છે કે, આ મેચમાં ભારતીય ક્રિકેટ ટીમના ભૂતપૂર્વ ખેલાડી વીરેન્દ્ર સેહવાગનો પુત્ર આર્યવીર ભારત અંડર-19 ટીમમાં ડેબ્યૂ કરી રહ્યો છે.
ડેબ્યૂમાં આર્યવીરની ઝલક
ભારતીય ક્રિકેટ ટીમના સુપરસ્ટાર બેટ્સમેન રહેલા વીરેન્દ્ર સેહવાગના પુત્ર આર્યવીરે હવે ભારત અંડર-19 ટીમ માટે પોતાની પહેલી મેચ રમી લીધી છે. ઓસ્ટ્રેલિયા સામેની આ મેચમાં ઓપનિંગ બેટિંગ કરતા તેણે 26 બોલમાં 28 રનની ઉપયોગી ઇનિંગ રમી હતી. આ દરમિયાન તેણે શાનદાર 5 ચોગ્ગા ફટકાર્યા હતા. પોતાના પિતાની જેમ જ આર્યવીરે પણ ચોગ્ગો ફટકારીને જ પોતાનું ખાતું ખોલાવ્યું હતું. જો કે, ઓસ્ટ્રેલિયાના બોલરોએ પણ શિસ્તબદ્ધ પ્રદર્શન કર્યું હતું.
ગ્રીનની બોલ પર વિકેટ ગુમાવી
આર્યવીરે જ્યારે ક્રિઝ પર મુશ્કેલ સમય વિતાવી લીધો હતો, તે જ સમયે તે સ્પેન્સર ગ્રીનની બોલ પર કેસી બાર્ટનને હાથે કેચઆઉટ થઇ ગયો હતો. એમ છતાં, આર્યવીરે પોતાની આ ડેબ્યૂ ઇનિંગથી પોતાની પ્રતિભાની ઝાંખી કરાવી દીધી છે. તે આગામી મેચોમાં મોટી ઇનિંગ રમીને આ સ્તર પર પોતાની જાતને સાબિત કરવા માંગશે. અગાઉ તેણે દિલ્હી અંડર-19 ટીમ માટે ઘરેલુ ક્રિકેટમાં શાનદાર પ્રદર્શન કર્યું હતું, જેના કારણે જ તેને જુનિયર નેશનલ ટીમમાં રમવાની તક મળી છે.
પિતા વીરેન્દ્ર સેહવાગની ઉપસ્થિતિ
અંડર-19માં પોતાના પુત્રનું ડેબ્યૂ મેચ નિહાળવા માટે વીરેન્દ્ર સેહવાગ પણ રાજકોટ પહોંચ્યો હતો, અને હાલ તેમની તસવીરો સોશિયલ મીડિયા પર ખૂબ વાઈરલ થઈ રહી છે. આર્યવીર સેહવાગ હવે આગામી મુકાબલો 21 સપ્ટેમ્બરના રોજ રમવાનો છે, જ્યાં જો વરસાદ નહીં પડે તો તે મેચ પૂરી 50 ઓવરની રમાઈ શકે છે. આવી સ્થિતિમાં ફેન્સ આર્યવીર પાસેથી મોટી સદીની આશા રાખશે. આર્યવીર પણ પોતાના પિતાની જેમ જ આગળ ચાલીને ટીમ ઇન્ડિયા માટે રમવા માંગે છે.
કોહલીને માને છે ફેવરિટ
દિલ્હી પ્રીમિયર લીગ દરમિયાન આપેલા એક ઇન્ટરવ્યુમાં આર્યવીરે વિરાટ કોહલીને પોતાના ફેવરિટ બેટ્સમેન ગણાવ્યા હતા. આથી તે તેની જ શૈલીમાં બેટિંગ કરવાનું પસંદ કરશે. તેના ડેબ્યૂ મેચને જોતા એ સ્પષ્ટ થઈ ગયું છે કે પોતાના પિતાની જેમ જ આર્યવીર પણ છગ્ગા કરતા ચોગ્ગા ફટકારવા પર વધુ ભરોસો કરે છે. જોકે, લાંબા-લાંબા સિક્સર ફટકારવાની કળા પણ આર્યવીર સેહવાગ પાસે છે, જેની ઝાંખી તેણે અગાઉ ઘરેલુ ક્રિકેટમાં બતાવી ચૂકી છે.