ભારતીય મહિલા ક્રિકેટ ટીમે શ્રીલંકાને 72 રનથી હરાવીને મહિલા એશિયા કપ 2026નો ખિતાબ જીતી લીધો.આ સાથે હરમનપ્રીત કૌરની આગેવાની હેઠળની ટીમે 8મી વખત એશિયા કપની ટ્રોફી પોતાના નામે કરી. જોકે, ભારતની ઐતિહાસિક જીત બાદ ટ્રોફી સેરેમની ચર્ચાનું કેન્દ્ર બની હતી. ભારતીય ટીમે એશિયન ક્રિકેટ કાઉન્સિલના અધ્યક્ષ અને પાકિસ્તાન ક્રિકેટ બોર્ડના પ્રમુખ મોહસિન નકવી પાસેથી ટ્રોફી સ્વીકારી નહોતી.હવે BCCIના સચિવ દેવજીત સૈકિયાએ આ નિર્ણય પાછળનું કારણ સ્પષ્ટ કર્યું છે. તેમણે જણાવ્યું કે ભારતીય ટીમનો આ નિર્ણય દેશના લોકોની લાગણી અને ગયા વર્ષે પુરુષોની ટીમે અપનાવેલા વલણને ધ્યાનમાં રાખીને લેવામાં આવ્યો હતો.

BCCI સચિવે શું કહ્યું?

દેવજીત સૈકિયાએ એક મીડિયા વાતચીત દરમિયાન પ્રથમ ભારતીય મહિલા ટીમના સમગ્ર ટૂર્નામેન્ટમાં શાનદાર પ્રદર્શનની પ્રશંસા કરી હતી. તેમણે કહ્યું કે ફાઇનલમાં શ્રીલંકાને 72 રનથી હરાવનાર ભારતીય ટીમે સમગ્ર એશિયા કપમાં દબદબો જાળવી રાખ્યો હતો.ભારતે ટૂર્નામેન્ટ દરમિયાન પાકિસ્તાનને પણ માત્ર 55 રનમાં ઓલઆઉટ કરીને મોટી જીત મેળવી હતી. સૈકિયાએ ખેલાડીઓ અને કોચિંગ સ્ટાફને ઐતિહાસિક ખિતાબ માટે અભિનંદન આપ્યા અને જણાવ્યું કે હવે ટીમનું ધ્યાન એશિયન ગેમ્સમાં દેશ માટે ગોલ્ડ મેડલ જીતવા પર છે.ટ્રોફી વિવાદ અંગે તેમણે કહ્યું કે ભારતીય ટીમનો નિર્ણય દેશની લાગણી અને ગયા વર્ષે પુરુષોની ટીમે અપનાવેલા વલણને ધ્યાનમાં રાખીને લેવામાં આવ્યો હતો.ભારત બહુરાષ્ટ્રીય સ્પર્ધાઓમાં પાકિસ્તાન સામે રમે છે, પરંતુ તેનો અર્થ એ નથી કે દરેક ઔપચારિકતા સ્વીકારવી જરૂરી છે.સૈકિયાએ સ્પષ્ટ કર્યું કે વર્તમાન સ્થિતિમાં કેટલાક લોકો પાસેથી ટ્રોફી સ્વીકારવી ભારત માટે યોગ્ય નથી. તેમણે યાદ અપાવ્યું કે લગભગ એક વર્ષ પહેલાં પુરુષોની ટીમ એશિયા કપ ચેમ્પિયન બની હતી ત્યારે પણ ટ્રોફીનો વિવાદ થયો હતો અને BCCI હજુ સુધી તે ટ્રોફી ભારતને પરત મળે તે માટે પ્રયાસ કરી રહ્યું છે.

BCCIએ આપ્યો હતો વિકલ્પ

દેવજીત સૈકિયાના જણાવ્યા મુજબ, BCCIએ ટ્રોફી સેરેમની માટે વૈકલ્પિક વ્યવસ્થા કરવાનો પ્રસ્તાવ મૂક્યો હતો.બોર્ડની માંગ હતી કે ACCના ઉપાધ્યક્ષ ભારતીય મહિલા ટીમને એશિયા કપની ટ્રોફી આપે.BCCIનું માનવું હતું કે આ રીતે સેરેમની સામાન્ય રીતે પૂર્ણ થઈ શકતી અને વિવાદની સ્થિતિ પણ ટાળી શકાત. જોકે, આ પ્રસ્તાવ પર સહમતિ બની નહોતી.સૈકિયાએ જણાવ્યું કે અગાઉ એશિયા કપમાં વિજેતા ટીમને તેના ક્રિકેટ બોર્ડના પ્રમુખ તરફથી ટ્રોફી આપવાની પરંપરા રહી છે. તેમણે બાંગ્લાદેશ અને શ્રીલંકાના ઉદાહરણનો ઉલ્લેખ કરતાં કહ્યું કે BCCI પણ આ પરંપરા મુજબ પોતાના પ્રતિનિધિ દ્વારા ટીમને ટ્રોફી અપાવવાની માંગ કરી રહ્યું હતું.

BCCI પોતાના વલણ પર અડગ

BCCI સચિવે કહ્યું કે બોર્ડનો હેતુ કોઈ નવો વિવાદ ઊભો કરવાનો નહોતો.તેની મુખ્ય માંગ એ હતી કે એશિયા કપની જૂની પરંપરા જાળવવામાં આવે.તેમણે કહ્યું કે છેલ્લા એક વર્ષમાં પરિસ્થિતિમાં કોઈ મોટો ફેરફાર થયો નથી.તેથી BCCI પોતાના અગાઉના વલણ પર જ અડગ છે.સૈકિયાએ આશા વ્યક્ત કરી કે બંને એશિયા કપની ટ્રોફી ટૂંક સમયમાં ભારતને મળી જશે.તેમણે એ પણ સ્પષ્ટ કર્યું કે ટ્રોફી સેરેમનીમાં જે કંઈ થયું તેનાથી ભારતીય મહિલા ટીમની ઐતિહાસિક જીતનું મહત્વ ઓછું થતું નથી.ટીમે સમગ્ર ટૂર્નામેન્ટમાં જે રીતે શાનદાર પ્રદર્શન કર્યું તે મહિલા ક્રિકેટમાં ભારતની વધતી તાકાતનો પુરાવો છે.હવે ભારતીય ટીમ આ વિવાદને પાછળ છોડીને એશિયન ગેમ્સની તૈયારી પર ધ્યાન આપશે.ભારત અગાઉ પણ મહિલા ક્રિકેટમાં એશિયન ગેમ્સનું ગોલ્ડ મેડલ જીતી ચૂક્યું છે અને હવે ટીમની નજર ફરી એકવાર ખિતાબ જાળવી રાખવા પર રહેશે.

આ પણ વાંચો – Women’s Asia Cupમાં જીત્યા બાદ PM મોદીનું મોટું નિવેદન, ટીમ ઈન્ડિયા માટે કહી આ મોટી વાત!