દુબઈમાં રમાઈ રહેલા મહિલા ટી20 એશિયા કપ 2026માં ભારતીય મહિલા ક્રિકેટ ટીમે શાનદાર પ્રદર્શન કરીને ફાઇનલમાં પોતાનું સ્થાન નિશ્ચિત કરી લીધું છે. 10 સપ્ટેમ્બરે રમાયેલા પ્રથમ સેમિફાઇનલ મુકાબલામાં ભારતે બાંગ્લાદેશને 40 રને હરાવીને ટૂર્નામેન્ટની ફાઇનલમાં પ્રવેશ કર્યો હતો. આ મેચમાં ભારતીય ટીમનો બેટિંગ અને બોલિંગ બંનેમાં દબદબો જોવા મળ્યો હતો.

ભારતે બાંગ્લાદેશને 40 રને હરાવ્યું

ટોસ હાર્યા બાદ પ્રથમ બેટિંગ કરવા ઉતરેલી ભારતીય મહિલા ટીમે 20 ઓવરમાં 6 વિકેટના નુકસાન પર 149 રન બનાવ્યા હતા. ભારત તરફથી શેફાલી વર્માએ શાનદાર બેટિંગ કરતાં 64 રનની મહત્વપૂર્ણ ઇનિંગ રમી હતી. તેમની આ ઇનિંગે ટીમને મજબૂત સ્કોર સુધી પહોંચાડવામાં મહત્વની ભૂમિકા ભજવી હતી.ભારતના 149 રનના જવાબમાં બાંગ્લાદેશની ટીમ 20 ઓવરમાં 7 વિકેટ ગુમાવીને માત્ર 109 રન જ બનાવી શકી હતી. ભારતીય બોલરોએ શરૂઆતથી જ બાંગ્લાદેશના બેટ્સમેનો પર દબાણ બનાવી રાખ્યું હતું. પરિણામે ભારતે આ મેચ 40 રને જીતીને ફાઇનલની ટિકિટ મેળવી હતી.

બેટિંગ અને બોલિંગથી હરમનપ્રીત કૌર ખુશ

મેચ બાદ ભારતીય ટીમની કેપ્ટન હરમનપ્રીત કૌરે ટીમના પ્રદર્શન અંગે ખુશી વ્યક્ત કરી હતી. તેમણે કહ્યું કે ટીમ જે રીતે આગળ વધી રહી છે તેનાથી તે ખૂબ જ ખુશ છે.ભારતીય ટીમ હાલમાં બેટિંગ અને બોલિંગ બંને વિભાગમાં સારું પ્રદર્શન કરી રહી છે.હરમનપ્રીતે મેચની પિચ અંગે પણ વાત કરી હતી. તેમણે જણાવ્યું કે આ મેચ બીજી પિચ પર રમાઈ હતી, જ્યાં સારી બોલિંગ કરનાર બોલરોને ફાયદો મળી રહ્યો હતો. ખાસ કરીને સ્પિન બોલરોને પિચમાંથી ઘણી મદદ મળી રહી હતી.તેમના જણાવ્યા અનુસાર, બંને ટીમના સ્પિનરોએ ખૂબ સારી બોલિંગ કરી હતી. બેટ્સમેનો સતત રન બનાવવાનો પ્રયાસ કરી રહ્યા હતા, પરંતુ પિચ સ્પિન બોલરો માટે મદદરૂપ હોવાથી તેમણે તેનો યોગ્ય રીતે ઉપયોગ કર્યો હતો.

દીપ્તિ શર્માના ઓલરાઉન્ડ પ્રદર્શનની પ્રશંસા

બાંગ્લાદેશ સામેની સેમિફાઇનલ મેચમાં ભારતીય ઓલરાઉન્ડર દીપ્તિ શર્માએ પણ મહત્વપૂર્ણ યોગદાન આપ્યું હતું. દીપ્તિએ બેટિંગમાં 13 રનની ઉપયોગી ઇનિંગ રમવાની સાથે બોલિંગમાં પણ શાનદાર પ્રદર્શન કર્યું હતું. તેમણે 3 મહત્વપૂર્ણ વિકેટ ઝડપી હતી.દીપ્તિના પ્રદર્શનથી ખુશ થયેલી કેપ્ટન હરમનપ્રીત કૌરે તેમની પ્રશંસા કરી હતી. હરમનપ્રીતે જણાવ્યું કે દીપ્તિએ બોલિંગમાં શાનદાર કામ કર્યું અને જ્યારે પણ ટીમને વિકેટની જરૂર હતી ત્યારે તેમણે મહત્વપૂર્ણ વિકેટ અપાવી હતી.

13 સપ્ટેમ્બરે રમાશે ફાઇનલ

બાંગ્લાદેશ સામેની જીત સાથે ભારતીય મહિલા ટીમે મહિલા ટી20 એશિયા કપ 2026ની ફાઇનલમાં પ્રવેશ કર્યો છે. ટૂર્નામેન્ટની આ છઠ્ઠી આવૃત્તિ છે અને ભારત છઠ્ઠી વખત ફાઇનલમાં પહોંચવામાં સફળ રહ્યું છે.હવે તમામની નજર 13 સપ્ટેમ્બરે રમાનારી ફાઇનલ મેચ પર છે. બીજા સેમિફાઇનલમાં શ્રીલંકા અને પાકિસ્તાનની ટીમ વચ્ચે મુકાબલો થશે. આ મેચની વિજેતા ટીમ ફાઇનલમાં ભારત સામે ટકરાશે. ભારતીય ટીમ હાલના ફોર્મને જોતા એશિયા કપનો ખિતાબ જીતવા માટે મજબૂત દાવેદાર માનવામાં આવી રહી છે.

આ પણ વાંચો –ચિપ્સ અને કોલ્ડ ડ્રિંક્સના પેકેટ પર હવે દેખાશે લાલ ચેતવણી! સુપ્રીમ કોર્ટ બાળકોના સ્વાસ્થ્ય માટે લેશે મોટો નિર્ણય