વર્લ્ડ ચેમ્પિયન્સ ઓફ લીગની 11મી મેચમાં ભારત અને દક્ષિણ આફ્રિકા વચ્ચે રોમાંચક મુકાબલો જોવા મળ્યો હતો. દક્ષિણ આફ્રિકાના કેપ્ટન એબી ડી વિલિયર્સે ટોસ જીતીને પહેલા બોલિંગ કરવાનો નિર્ણય લીધો હતો. જોકે, ભારતીય ઓપનર રોબિન ઉથપ્પાએ આ નિર્ણયને તદ્દન ખોટો સાબિત કરી દીધો હતો. ઇનિંગની શરૂઆત કરવા ઉતરેલા ઉથપ્પાએ પ્રથમ ઓવરથી જ આક્રમક વલણ અપનાવ્યું હતું અને વિરોધી બોલરો પર આકરા પ્રહારો કર્યા હતા.

6 છગ્ગા અને 6 ચોગ્ગા સાથે ધમાકેદાર ફિફ્ટી

રોબિન ઉથપ્પાએ પોતાની ઇનિંગ દરમિયાન મેદાનની ચારેય તરફ જોવાલાયક શોટ્સ ફટકાર્યા હતા. તેમણે માત્ર 31 બોલમાં 248.39ના વિસ્ફોટક સ્ટ્રાઇક રેટથી 77 રન બનાવ્યા હતા. આ તોફાની ઇનિંગમાં તેમણે 6 આકાશી છગ્ગા અને 6 ચોગ્ગા ફટકાર્યા હતા. અંબાતી રાયડુ સાથે મળીને ઉથપ્પાએ પાવરપ્લેમાં ટીમ ઇન્ડિયાને એક મજબૂત અને ઝડપી શરૂઆત અપાવી હતી, જેના કારણે પાછળથી આવનારા બેટ્સમેનો માટે કામ આસાન થઈ ગયું હતું.

સ્ટુઅર્ટ બિન્નીની અડધી સદી અને યુસુફનું યોગદાન

મધ્યમ ઓવરોમાં થોડી વિકેટો ઝડપથી પડી ગયા બાદ ઓલરાઉન્ડર સ્ટુઅર્ટ બિન્નીએ ઇનિંગને સંભાળી હતી. બિન્નીએ માત્ર 30 બોલમાં 166.67ના સ્ટ્રાઇક રેટથી 50 રન બનાવ્યા હતા, જેમાં 2 ચોગ્ગા અને 5 છગ્ગા શામેલ હતા. આ સિવાય યુસુફ પઠાણે પણ ઝડપી બેટિંગ કરતા 23 બોલમાં 24 રન જોડ્યા હતા, જ્યારે અંબાતી રાયડુએ 19 રનનું યોગદાન આપ્યું હતું. કેપ્ટન યુવરાજ સિંહ ગોલ્ડન ડક પર આઉટ થયા હોવા છતાં ભારતીય ટીમે નિર્ધારિત 20 ઓવરમાં 7 વિકેટના નુકસાને 196 રનનો વિશાળ સ્કોર ઊભો કર્યો હતો.

દક્ષિણ આફ્રિકાના બોલરો પર ભારતીય બેટ્સમેન ભારે

દક્ષિણ આફ્રિકા તરફથી ઇમરાન તાહિર અને શૌન વોન બર્ગે 2-2 વિકેટ ઝડપી હતી, પરંતુ ભારતીય બેટ્સમેનો ખાસ કરીને ઉથપ્પા અને બિન્નીના આક્રમક પ્રહાર સામે તેમની બોલિંગ ખૂબ મોંઘી સાબિત થઈ હતી. ઉથપ્પા અને બિન્નીની તોફાની બેટિંગના દમ પર ઇન્ડિયા ચેમ્પિયન્સે મેચ પર પોતાની પકડ મજબૂત બનાવી લીધી હતી.

આ પણ વાંચો: Ranji Trophy: 11 ઓક્ટોબરથી રણજી ટ્રોફીનો ધમાકો, એકસાથે રમતા જોવા મળશે ભારતીય સ્ટાર્સ