અમદાવાદ : ભારત વિશ્વની સૌથી ઝડપથી વૃદ્ધિ પામતી અર્થવ્યવસ્થા છે પરંતુ ભારતનું અર્થતંત્ર હજી પણ સર્વિસ સેક્ટર ઓરિયન્ટેડ ગણાય છે, ભારતનું મેન્યુફેકચરિંગ હજી પણ અન્ય દેશોની સરખામણીએ પાછળ છે. તાજેતરમાં જારી કરાયેલ એશિયા મેન્યુફેક્ચરિંગ ઇન્ડેક્સ (એએમઆઈ) ૨૦૨૬ મુજબ ભારત ૧૧ એશિયન દેશોમાં છઠ્ઠા સ્થાને પહોંચ્યું છે. આ સૂચકાંક દર્શાવે છે કે મજબૂત આર્થિક મૂળભૂત બાબતો હોવા છતાં, ભારત હજુ પણ ઘણા મોરચે તેના મુખ્ય એશિયન સ્પર્ધકોથી ઘણું પાછળ છે અર્થાત ભારતે એશિયન મેન્યુફેક્ચરિંગ રેસમાં તેની ગતિ ઝડપી બનાવવાની જરૃર પડશે.
હોંગકોંગ સ્થિત કન્સલ્ટિંગ ફર્મ ડેઝાન શિરા એન્ડ એસોસિએટ્સ દ્વારા સતત ત્રીજા વર્ષે બહાર પાડવામાં આવેલી આ યાદીમાં ચીને ફરી એકવાર ટોચનું સ્થાન જાળવી રાખ્યું છે. મલેશિયાએ મોટો અપસેટ સર્જ્યો છે અને તે વિયેતનામને પાછળ છોડીને બીજા સ્થાને આવી ગયું છે, જ્યારે વિયેતનામ ત્રીજા સ્થાને સરકી ગયું છે.