જિલ્લામાં ખનીજચોરી અટકાવવા માટે ફ્લાઈંગ સ્કવોર્ડ દ્વારા કાર્યવાહી કરવામાં આવી રહી છે ત્યારે ભુજના મિરજાપર રોડ તેમજ મુન્દ્રાના ગજોડ અને ગુંદાલામાં ખનિજચોરી ઝડપી લેવામાં આવી છે.3 કાર્યવાહીમાં 5 ડમ્પર અને મશીન જપ્ત કરી આગળની તપાસ શરૂ કરવામાં આવી છે. જિલ્લા કલેક્ટર આનંદ પટેલના માર્ગદર્શન હેઠળ ફ્લાઇંગ સ્કવોર્ડના મદદનીશ નિયામક મેહુલકુમાર શાહની તપાસ ટીમ દ્વારા કાર્યવાહી કરવામાં આવી છે ટીમ દ્વારા ભુજ તાલુકાના ગજોડ સીમ વિસ્તારમાં બાતમીના આધારે કાર્યવાહી કરવામાં આવી હતી જેમાં બ્લેકટ્રેપ ખનિજનું ગેરકાયદે ખનન કરતુ એક એસ્કેવેટર મશીન તથા બે ડમ્પર પકડવામાં આવ્યા હતા આ મશીન તથા બે ડમ્પરને સિઝ કરી સરકારી ગોદામ ભુજ ખાતે કસ્ટડીમાં સોંપવામાં આવ્યા છે. આ સાથે મુન્દ્રા તાલુકાના ગુંદાલા ગામ પાસેથી સાદી રેતી ખનિજનું રોયલ્ટી પાસ વગર વહન કરતા એક ડમ્પરને પકડી મુન્દ્રા પોલીસ સ્ટેશન ખાતે કસ્ટડીમાં સોંપવામાં આવ્યું છે.જ્યારે બુધવારે વહેલી સવારે મીરજાપર-ભુજ હાઈવે ખાતે સાદી રેતી ખનિજનું રોયલ્ટી પાસ વગર વહન કરતા બે ડમ્પરને પકડી સિઝ કરી સરકારી ગોદામ, ભુજ ખાતે કસ્ટડીમાં સોંપવામાં આવ્યા છે.