અડાજણ પોલીસમાં નોંધાયેલા બ્લેકમેઇલના ગુનામાં આરોપીના પરિવારને જેલરના નામે ફોન કરીને પૈસાની માંગણી કરનાર ઠગ અમદાવાદથી પકડાયો છે. પોલીસે તેને કોર્ટમાં રજૂ કરી ચાર દિવસના પોલીસ રિમાન્ડ મેળવ્યા છે. અડાજણ પોલીસમાં બ્લેકમેઇલ કરીને કાકા સસરા પાસેથી રૂ.10 કરોડની ખંડણી માંગવાના ગુનાના આરોપી ના પરિવારને જેલમાં સુવિધા આપવાના બહાને રૂ.15 હજારની માંગણી કરનાર ગઠીયા રાજેશ નરેન્દ્ર ત્રિવેદી (ઉવ.49)ને અમદાવાદ પોલીસે તેના નિવાસસ્થાન આનંદ સોસાયટી વિભાગ-1 જયમાલા ઇશનપુર અમદાવાદથી પકડી પાડ્યો છે. પોલીસના જણાવ્યા પ્રમાણ રાજેશ મોરબીથી ટાઇલ્સ મંગાવીને કમિશન પર વેચવાનો ધંધો કરતો હતો. ઝાંપા બજાર તૈયબી પેલેસમાં રહેતા મઝહરસાબ કમરસાબ સૈયદ હોટલ ચલાવે છે. તેના સાળો સલમાન લાજપોર જેલમાં હોવાની જાણ થતા તા.16-11-2025ના રોજ રાજેશે મઝહરસાબ ને ફોન કરીને લોજપોર જેલમાંથી બોલતા હોવાનું કહીને તુમ પેમેન્ટ કરોગે તો મેં ઉસકો રખુંગા બાકી મેં ઉસકો લોકઅપ મે ડાલ દેતા હું કહીને રૂ. 7000 માંગ્યા હતા.