આંતરરાષ્ટ્રીય પ્રવાસીઓની સંખ્યામાં સતત થઈ રહેલા વધારાને ધ્યાનમાં રાખીને, ભારતીય કસ્ટમ્સ વિભાગે વિદેશથી આવતા મુસાફરો માટે સામાન (Baggage) ના નિયમો ફરીથી સ્પષ્ટ કર્યા છે. ખાસ કરીને સોનાની મર્યાદા, ડ્યુટી-ફ્રી લિમિટ અને કઈ વસ્તુઓ ડિક્લેર કરવી જરૂરી છે તેના પર ભાર મૂકવામાં આવ્યો છે. અમદાવાદના સરદાર વલ્લભભાઈ પટેલ ઈન્ટરનેશનલ (SVPI) એરપોર્ટના કસ્ટમ્સ ડેપ્યુટી/આસિસ્ટન્ટ કમિશનરની કચેરી દ્વારા જારી કરાયેલ આ માર્ગદર્શિકાનો મુખ્ય હેતુ એ છે કે મુસાફરો અજાણતા કાયદાનું ઉલ્લંઘન ન કરે.
કસ્ટમ્સ અધિકારીઓના જણાવ્યા અનુસાર, સોનું એ એવી કેટેગરી છે જેમાં સૌથી વધુ મૂંઝવણ જોવા મળે છે અને તેના નિયમોનું વારંવાર ઉલ્લંઘન થાય છે. તાજેતરમાં એરપોર્ટ પર પકડાયેલા સોનાના કિસ્સાઓ બાદ જનજાગૃતિ લાવવા આ સ્પષ્ટતા કરવામાં આવી છે.