રાણાવવ પોલીસે ગેરકાયદેસર દારૂના ધંધાને રોકવા માટે વિશેષ અભિયાન ચલાવ્યું હતું. આ અંતર્ગત, પોલીસે એક જ દિવસમાં ત્રણ અલગ-અલગ દેશી દારૂ બનાવવાની ભઠ્ઠીઓ પર દરોડા પાડી લાખો રૂપિયાનો મુદ્દામાલ જપ્ત કર્યો હતો. જોકે, ત્રણેય સ્થળોએથી આરોપીઓ દરોડા દરમિયાન નાસી છૂટ્યા હતા. પોલીસે આ મામલે ત્રણ જુદા પ્રોહિબિશન કેસ દાખલ કર્યા છે. પોલીસ સૂત્રો પાસેથી મળતી માહિતી મુજબ, સબ ઇન્સ્પેક્ટર આર.વી. મોરી અને તેમનો સ્ટાફ પેટ્રોલિંગમાં હતો. તે દરમિયાન સર્વેલન્સ સ્ટાફના કોન્સ્ટેબલ સંજય વાલાભાઈ, સરમણ દેવાયતભાઈ અને જયમલ સામતભાઈને મળેલી ચોક્કસ બાતમીના આધારે પોલીસે તાત્કાલિક કાર્યવાહી કરી હતી. પ્રથમ દરોડો રાણા વડવાળા ગામમાં રાજુ કિશોરભાઈ ફળદુની ભઠ્ઠી પર પાડવામાં આવ્યો હતો. અહીંથી 80 લીટર દેશી દારૂ અને દારૂ બનાવવાની ભઠ્ઠી સંબંધિત સાધનો જપ્ત કરવામાં આવ્યા હતા. જોકે, દરોડા દરમિયાન આરોપી રાજુ ફળદુ ફરાર થઈ ગયો હતો. બીજી રેડ રાજુ મેણંદભાઈ રાતીયાની ભઠ્ઠી પર કરવામાં આવી હતી. આ સ્થળેથી 30 લીટર દારૂ બનાવવાનો આથો, 15 લીટર તૈયાર દેશી દારૂ અને ભઠ્ઠીના સાધનો જપ્ત કરાયા હતા. પોલીસ પહોંચે તે પહેલાં જ આરોપી રાજુ રાતીયા પણ સ્થળ પરથી નાસી છૂટ્યો હતો. ત્રીજો દરોડો જયમલ ભરતભાઈ ઓડેદરાની ભઠ્ઠી પર પાડવામાં આવ્યો હતો. અહીંથી 190 લીટર દારૂ બનાવવાનો આથો અને ભઠ્ઠીનું સામાન જપ્ત કરવામાં આવ્યું હતું. આ આરોપી જયમલ ઓડેદરા પણ દરોડા સમયે સ્થળ પર હાજર નહોતો. ત્રણેય દરોડા દરમિયાન આરોપીઓ ફરાર થઈ જતાં પોલીસે તેમની ધરપકડ માટે વધુ તપાસ હાથ ધરી છે. પોલીસ સૂત્રોએ જણાવ્યું હતું કે ફરાર આરોપીઓને વહેલી તકે ઝડપી પાડવામાં આવશે.