વલસાડ જિલ્લામાં નંદાવલા ગામ નજીક નેશનલ હાઈવે નં.48 પર પોલીસે કાર્યવાહી કરીને વિદેશી દારૂ ભરેલું એક કન્ટેનર ઝડપી પાડ્યું છે. આ કાર્યવાહીમાં કુલ ₹39.22 લાખનો મુદ્દામાલ જપ્ત કરવામાં આવ્યો છે. પોલીસે એક આરોપીની ધરપકડ કરી છે, જ્યારે અન્ય બે શખ્સોને વોન્ટેડ જાહેર કર્યા છે. આ ઘટના 19 નવેમ્બર, 2025ના રોજ સાંજે લગભગ 8:30 થી 9 વાગ્યાની આસપાસ બની હતી. હેરે કૃષ્ણા હોટલ નજીક નાકાબંધી દરમિયાન પોલીસને એક કન્ટેનર (HR-62-A-6298) શંકાસ્પદ હાલતમાં દેખાતા તેને અટકાવવામાં આવ્યું હતું. વલસાડ રૂરલ પોલીસે કન્ટેનરની તપાસ કરતા તેમાંથી ₹17.98 લાખની કિંમતનો વિદેશી દારૂનો જથ્થો મળી આવ્યો હતો. દેવ કાર્ગો મુવર્સના બંધ કન્ટેનરમાં ખાલી બોટલો ભરેલા કુલ 1,354 બોક્સની આડમાં વિદેશી દારૂના 126 બોક્સ છુપાવવામાં આવ્યા હતા, જેમાં કુલ 4,032 બોટલો હતી. કન્ટેનર ચાલક નાસિર મજીદ ઇસબ દેઠવાલ (ઉંમર 27, રહે. ગોહાવા, નગીણા, હરિયાણા)ને સ્થળ પરથી જ ઝડપી પાડવામાં આવ્યો હતો. તેની પાસેથી મોબાઇલ ફોન અને ફાસ્ટેગ કાર્ડ પણ જપ્ત કરવામાં આવ્યા છે. આ કેસમાં ક્લીનર શૌકત, જે ઘટના દરમિયાન કન્ટેનર લઈને નાસી ગયો હતો, તેમજ હરિયાણાના ગુડગાંવનો દારૂ સપ્લાયર રામ, એમ બે શખ્સો વોન્ટેડ છે. તેમના સંપૂર્ણ નામ-સરનામાની માહિતી ઉપલબ્ધ નથી. વલસાડ જિલ્લામાં ચાલતી ગેરકાયદેસર પ્રવૃત્તિઓને અંકુશમાં લાવવા વલસાડ SP યવરાજસિંહ જાડેજાની સૂચનાના આધારે વલસાડ રૂરલ PI એસ.એન. ગડ્ડુના નેતૃત્વમાં પોલીસ ટીમ પેટ્રોલિંગ કરી રહી હતી, તે દરમિયાન આ સફળતા મળી હતી. આ સમગ્ર કાર્યવાહી પ્રોહિબિશન એક્ટ કલમ 65(A)(E), 81, 98(2) અને 116(ખ) હેઠળ કરવામાં આવી છે. વલસાડ પોલીસ વોન્ટેડ આરોપીઓની શોધખોળ માટે વધુ તપાસ હાથ ધરી રહી છે.