મહેસાણા મહાનગરપાલિકા દ્વારા શહેરમાં નવા વાહન ખરીદીમાં વ્હીકલ ટેક્સ લાગુ કરવાના નિર્ણય સામે વાંધા સુચનો લેવાઇ રહ્યા છે. જેમાં બુધવારે નગરપાલિકાના પૂર્વ વિપક્ષ નેતા કમલેસ સુતરિયાએ શહેરમાં ગટરની કુંડીઓ પણ રોડ લેવલ નથી, વાહનો ખાડામાં પટકાઇને જતા હોઇ ખાડા યથાવત છે, વાહનો પાર્કિંગ માટે કોઇ જગ્યાઓ પણ મનપાએ ઉભી કરી નથી સહિતના કારણો આગળ ધરીને વ્હીકલ ટેક્સ સામે વાંધો ઉઠાવી વ્હીકલ ટેક્સ મુલત્વી રાખવા લેખિત માંગ કરી છે. નગરપાલિકા પૂર્વ વિપક્ષ નેતા કમલેસ સુતરીયાએ કહ્યું કે, ચોમાસામાં અનેક વિસ્તારોમાં લાંબા સમય સુધી પાણી ભરાઇ રહેતા હોઇ પાણીમાં વાહન ચલાવવાથી વ્હીકલોને નુકશાન થયેલ છે. મહાનગરપાલિકા વિસ્તારમાં ટ્રાફીકની સમસ્યા પણ હજુ નક્કર પગલાના અભાવે જૈ સે થે જેવી છે.નગરજનોને મહાનગરપાલિકા જેવી મળવી જોઇએ તેવી સુવિધા મળતી નથી.પાર્કીગની જગ્યામાં ગેરકાયદે દબાણો કરવામાં આવેલ હોવા છતાં તે દુર કરવામાં આવી રહ્યા નથી કારણે શહેરમાં પાર્કીગની પણ મોટી સમસ્યા થઇ રહી હોવાની હકીકતો સામે આવી છે. ગ્રામ્ય વિસ્તારો હમણા મનપામાં સમાવેશ થયો પણ હજુ ત્યાના રસ્તામાં સુધારો થયો નથી. ત્યારે મહાનગરપાલિકા વિસ્તારમાં 100 ટકા રસ્તા સારા બને, ટ્રાફીકની સમસ્યા હળવી થાય ત્યારબાદ વ્હીકલ ટેક્સની વિચારણા કરવી જોઇએ.હાલ વ્હીકલ ટેક્સ અમલ વિચારણા મુલત્વી રાખવા માંગ છે.