વાપી GIDC પોલીસે ગેરકાયદેસર દારૂ પાર્ટી પર દરોડો પાડી 10 લોકોને ઝડપી પાડ્યા છે. આ કાર્યવાહી દરમિયાન ₹1.30 લાખથી વધુનો મુદ્દામાલ જપ્ત કરવામાં આવ્યો હતો. વાપી GIDC પોલીસ સ્ટાફ દ્વારા વિસ્તારમાં ગેરકાયદેસર પ્રવૃત્તિઓ રોકવા માટે રાત્રી પેટ્રોલિંગ ચાલી રહ્યું હતું. તે દરમિયાન નેશનલ હોટલની બાજુમાં આવેલા GM ગેસ્ટ હાઉસના રૂમ નંબર 108માં ગેરકાયદેસર દારૂ પાર્ટી ચાલી રહી હોવાની ચોક્કસ બાતમી મળી હતી. બાતમીના આધારે પોલીસે સ્થળ પર છાપો માર્યો હતો. પોલીસના આગમનની જાણ થતાં જ અંદરથી દરવાજો બંધ કરી દેવાયો હતો. જોકે, પોલીસે દરવાજો ખખડાવતા એક વ્યક્તિએ દરવાજો ખોલ્યો હતો, ત્યારબાદ પંચોની હાજરીમાં રૂમની તપાસ શરૂ કરવામાં આવી હતી. રૂમમાં કુલ 07 પુરુષો અને 03 મહિલાઓ દારૂની મહેફિલ માણતા મળી આવ્યા હતા. તપાસ દરમિયાન કોઈ પણ વ્યક્તિ પાસે દારૂ પીવાની પાસ પરમિટ મળી ન હતી, જેથી તેમને કાયદેસરની કાર્યવાહી હેઠળ લેવામાં આવ્યા હતા. પોલીસે સ્થળ પરથી વિદેશી દારૂનો જથ્થો અને 10 મોબાઇલ ફોન સહિત કુલ ₹1,30,246નો મુદ્દામાલ જપ્ત કર્યો હતો. રૂમમાંથી મળેલા ડિસ્પોઝેબલ ગ્લાસ, નમકીન અને દારૂથી ભરેલા ગ્લાસમાંથી આવતી તીવ્ર વાસનું પંચનામું તૈયાર કરવામાં આવ્યું હતું. કેફી પ્રવાહીનો પંચોની હાજરીમાં સ્થળ પર જ નાશ કરવામાં આવ્યો હતો. ઝડપાયેલા લોકોમાં મધ્યપ્રદેશ, ઉત્તર પ્રદેશ, મહારાષ્ટ્ર, ગોવા, ગુજરાત અને પશ્ચિમ બંગાળના રહેવાસીઓનો સમાવેશ થાય છે. પુરુષો ઉપરાંત ત્રણ મહિલાઓ પણ આ પાર્ટીમાં સામેલ હતી. પોલીસે તમામ આરોપીઓ વિરુદ્ધ પ્રોહિબિશન એક્ટની કલમ 66(1)(B), 81, 83, 86 અને 65(AA) હેઠળ ગુનો નોંધી વધુ તપાસ હાથ ધરી છે. વાપી GIDC પોલીસે જણાવ્યું હતું કે વિસ્તારમાં ગેરકાયદેસર પ્રવૃત્તિઓ, ખાસ કરીને દારૂ સંબંધિત ગુનાઓ પર સખત પગલાં લેવામાં આવશે અને આવી કાર્યવાહી ભવિષ્યમાં પણ ચાલુ રહેશે. દારૂની પાર્ટીમાં ઝડપાયેલા લોકો