મુખ્યમંત્રી ભૂપેન્દ્ર પટેલની અધ્યક્ષતામાં બુધવારે મળેલી રાજ્ય મંત્રીમંડળની બેઠકમાં હાલ રવિ પાકનું વાવેતર ચાલી રહ્યું હોવાથી મહેસાણા જિલ્લાના બહુચરાજી સહિત ઉ.ગુ.ના આઠ અને રાજ્યના કુલ 13 તાલુકાઓમાં વીજ પુરવઠો 8 કલાકથી વધારી 10 કલાક આપવાનો નિર્ણય કર્યો છે. ગુરુવારથી જ મહેસાણા, પાટણ, અમદાવાદ, સુરેન્દ્રનગર, વાવ-થરાદ અને મોરબી જિલ્લાના 13 તાલુકાઓમાં ખેતીવાડી ફીડરો પર વીજ પુરવઠો 8 કલાકથી વધારી 10 કલાક કરાશે. આ નિર્ણયથી અંદાજે 1,090 ગામોના 49 હજારથી વધુ ખેડૂતો લાભાન્વિત થશે. મહેસાણા જિલ્લામાં બહુચરાજી તાલુકા, પાટણના સમી, હારિજ, શંખેશ્વર, રાધનપુર અને સાંતલપુર, વાવ-થરાદના સુઇગામ અને વાવ તાલુકાને 10 કલાક વીજ પુરવઠો મળશે. જેનાથી ખેડૂતોને ફાયદો થશે.