સુરતના વરાછા વિસ્તારમાં આજે એક મોટી દુર્ઘટના ટળી ગઈ હતી, જેમાં એક ક્રેન કન્સ્ટ્રક્શન માટે ખોદાયેલા ઊંડા ખાડામાં ખાબકી પડી હતી. આ ઘટના વરાછા વિસ્તારની અંકુર સોસાયટી પાસે આવેલી દિવાળીબા ઇન્ડસ્ટ્રીઝમાં બની હતી. આ દુર્ઘટના ત્યારે બની જ્યારે ઇન્ડસ્ટ્રીઝમાં એમ્બ્રોઈડરી મશીન ઉતારવાની કામગીરી ચાલી રહી હતી. આ કામગીરી માટે એક વિશાળ ક્રેનનો ઉપયોગ કરવામાં આવી રહ્યો હતો. મશીન ઉતારતી વખતે અચાનક ઇન્ડસ્ટ્રીઝની એક દીવાલ ધરાશાયી થઈ હતી. દીવાલ ધરાશાયી થવા સાથે જ ક્રેનનો સપોર્ટ હટતાં, ક્રેન નજીકમાં જ રોડની બાજુમાં બાંધકામ માટે ખોદવામાં આવેલા ઊંડા ખાડામાં નીચે પડી હતી. આ ખાડો બાંધકામ પ્રોજેક્ટ માટે ખોદવામાં આવ્યો હોવાથી તે પૂરતો ઊંડો હતો. ક્રેન પૂરી રીતે તેમાં ખાબકી હતી. સૌથી રાહતની વાત એ છે કે આ ગંભીર દુર્ઘટનામાં કોઈ જાનહાની થઈ નથી. ક્રેન નીચે પડવાની ક્ષણે ડ્રાયવરે સમયસૂચકતા વાપરી હતી. ક્રેન નીચે પડવાનું શરૂ થતાં જ ડ્રાયવર તાત્કાલિક કૂદીને નીચે ઉતરી ગયો હતો. ડ્રાયવરના આ પગલાને કારણે તે સુરક્ષિત બચી ગયો હતો અને એક મોટી જાનહાની ટળી હતી. ક્રેનને ખાડામાંથી બહાર કાઢવાની અને બાંધકામની જગ્યાને સુરક્ષિત કરવાની કામગીરી હાથ ધરવામાં આવી હતી. આ ઘટનાને પગલે વરાછા વિસ્તારમાં લોકોના ટોળાં એકઠા થયા હતા.