અમદાવાદના પીપળજ વિસ્તારમાં આવેલી એક કેમિકલ ફેક્ટરીમાં આજે અચાનક ભીષણ આગ ફાટી નીકળતા સમગ્ર વિસ્તારમાં અફરાતફરીનો માહોલ સર્જાયો છે. આગ એટલી વિકરાળ છે કે તેને કાબૂમાં લેવા માટે ફાયર બ્રિગેડ દ્વારા ‘મેજર કોલ’ જાહેર કરવામાં આવ્યો છે. હર્ષ એન્ટરપ્રાઈઝમાં આગનું તાંડવ મળતી માહિતી મુજબ પીપળજ રોડ પર આવેલી ‘હર્ષ એન્ટરપ્રાઈઝ’ નામની કેમિકલ ફેક્ટરીમાં આ આગ લાગી છે. ફેક્ટરીમાં મોટા પ્રમાણમાં કેમિકલ અને જ્વલનશીલ પદાર્થો હોવાને કારણે આગ ખૂબ જ ઝડપથી પ્રસરી ગઈ હતી.

કેમિકલ ફેક્ટરીમાં લાગેલી આગ બની બેકાબૂ

આગના કાળા ધુમાડાના ગોટેગોટા કિલોમીટર દૂરથી પણ જોઈ શકાય છે, જેને પગલે આસપાસની અન્ય ફેક્ટરીઓમાં પણ ભયનો માહોલ છે. ફાયર વિભાગ દ્વારા યુદ્ધના ધોરણે કામગીરી ઘટનાની જાણ થતા જ અમદાવાદ ફાયર બ્રિગેડનો કાફલો ઘટનાસ્થળે દોડી ગયો છે. હાલમાં 25 થી વધુ ફાયર ફાઈટરની ગાડીઓ આગ પર કાબૂ મેળવવા માટે પાણીનો મારો ચલાવી રહી છે. કેમિકલની આગ હોવાથી તેને ઠારવા માટે ખાસ ફોમ (Foam) અને અત્યાધુનિક સાધનોનો પણ ઉપયોગ કરવામાં આવી રહ્યો છે.

પાણીનો મારો ચલાવી આગને કાબૂમાં લેવા પ્રયાસ શરૂ

જાનહાનિના સમાચાર નથી પ્રાથમિક જાણકારી મુજબ, અત્યાર સુધી કોઈ જાનહાનિના સમાચાર પ્રાપ્ત થયા નથી. ફાયર વિભાગના જવાનો ફેક્ટરીમાં કોઈ ફસાયેલું ન હોય તેની ખાતરી કરી રહ્યા છે. આગ લાગવાનું ચોક્કસ કારણ હજુ જાણી શકાયું નથી, પરંતુ શોર્ટ સર્કિટ હોવાની શક્યતા વ્યક્ત કરવામાં આવી રહી છે. સલામતીના ભાગરૂપે વિસ્તારનો વીજ પુરવઠો કાપી નાખવામાં આવ્યો છે.

ગુજરાતના વધુ સમાચાર વાંચવા માટે ક્લિક કરો