Ahmedabad News : અમદાવાદમાં બિનધાસ્ત દારૂ પીવો, કાર ચલાવી વાહનોને અડફેટે લો, કે અકસ્માત સર્જો, તો પણ પોલીસ તમને છોડી મૂકશે, શરત માત્ર એટલી કે તમે કોઈ માલેતુજાર કે વગતાર વ્યક્તિ કે તેમના પરિવારના સભ્ય હોવા જોઈએ. ગુજરાતમાં દારૂબંધીના કાયદાના લીરેલીરા ઉડાડતી વધુ એક ઘટના અમદાવાદના શીલજ વિસ્તારમાં સામે આવી છે. રાજ્યના શાસકો ભલે ‘ચમરબંધીઓને નહીં છોડવાની’ ગુલબાંગો પોકારતા હોય, પરંતુ અમદાવાદ પોલીસની કાર્યવાહી જોઈને લાગે છે કે જો તમે વગદાર કે માલેતુજાર હોવ, તો કાયદો તમારા માટે માત્ર એક કાગળનો ટુકડો છે. શીલજ-રાંચરડા રોડ પર ચિક્કાર દારૂ પીને 9 વાહનોને અડફેટે લેનાર નબીરાને પોલીસે ગણતરીના કલાકોમાં જ મુક્ત કરી દેતા અનેક સવાલો ઉભા થયા છે.